Helga lásasmiður vann 175 milljónir króna í Las Vegas: „Við höldum ró okkar yfir þessu öllu saman“

Það vant­aði ekki salt í graut­inn hennar Helgu Love sem vann stóran lottó­vinn­ing árið 1995.

„Við tökum þessu með jafn­að­ar­geði. Ef við værum yngri ótt­ast ég að við hefðum misst stjórn á öllu þessu og hætt að vinna. Við höfum þroskast og núna held ég að við höldum ró okkar yfir þessu öllu saman. Við erum bæði i sömu atvinn­unni og þetta hefur ekki afger­andi áhrif á líf okkar að öðru leyti en því að við keyptum okkur nýtt hús og nýjan bíl,“ sagði Helga Love við DV árið 1995 eftir að hafa unnið stóran lottó­vinn­ing. Hún bjó í Las Vegas með Gerald Love, eig­in­manni sínum, en þau störf­uðu bæði sem lása­smiðir.

Vill læra íslensku

„Ég tala ekki íslensku en mamma reyndi að kenna mér málið þegar ég var barn. Ég var á þeim tíma upp­tekin af öðrum hlutum og hafði engan tíma til að læra málið. Núna hef ég fullan hug á að læra íslensk­una sem er móð­ur­mál mitt. Ég stefni að því að fara í heim­sókn til Íslands næsta sumar,“ sagði Helga en hún hafði árið 1995 aðeins komið einu sinni til Íslands en þá gisti hún hjá frænku sinni árið 1973, þá 17 ára gömul. Þá átti hún hálf­bróður en sá hét Ómar Ein­ars­son sem var skip­stjóri í Keflavík.

„Hún dvald­ist hjá mér í einn mánuð og við ferð­uð­umst vítt og breitt um landið. Hún heim­sótti þá meðal ann­ars Svein­björn Bein­teins­son alls­herj­ar­goða, móð­ur­bróður sinn. Hún Helga og Gerald Love, sem búa í Las Vegas, fengu um 175 millj­ónir íslenskra króna í lottó­vinn­ing. Þau eru bæði miklir áhuga­menn um hesta. Helga, sem á íslenska móður, heldur miklum tengslum við ísi­and og ætlar að koma í heim­sókn næsta sumar. Hún var mjög hrifin af landi og þjóð,“ sagði frænkan við DV en hún vildi ekki koma fram undir nafni.

Mjög ánægju­legt

„Helga er mjög yfir­veguð, greind og hlý. Ég hef tvisvar heim­sótt hana til Banda­ríkj­anna og hún hyggst koma hingað næsta sumar. Þá reikna ég með að við ferð­umst um Vest­firði þar sem hún hefur aldrei komið. Hún hefur haldið tengslum hingað og við skrif­umst reglu­lega á. Það er óhætt að segja að hún sé sannur Íslands­vinur. Það var svo­lítið fyndið að ég fékk bréf frá henni með þessum tíð­indum nú fyrir skömmu en það bréf hafði verið lengi á leið­inni. Það hafði vantað 10 cent upp á póst­burð­ar­gjaldið og bréfið var þess vegna end­ur­sent heim til hennar.“

„Það er mjög ánægju­legt að hún skuli hafa fengið þennan vinn­ing. Ég vona bara að þetta verði þeim báðum til góðs,“ sagði bróðir Helgu um málið í sam­tali við DV.