Fréttamaðurinn knái, Heimir Már Pétursson, var í fremstu víglínu Flokks fólksins fyrst eftir að skörungurinn Inga Sæland réði hann sem framkvæmdastjóra þingflokksins. Heimir var í fyrstu ævinlega við hlið Ingu og svaraði gjarnan fyrir hana þegar hann taldi þess vera þörf. En svo hvarf hann skyndilega af sjónarsviðinu og þótti sýnt að Inga hefði ákveðið að hann ætti að vera til hlés.
Heimir braust síðan eftirminnilega út úr prísund sinni þegar hann skoraði á Emmanuel Macron, forseta Frakklands, í athugasemd á samfélagsmiðlinum X að senda hermenn til Úkraínu og gera kjarnorkuvopn klár og er óhætt að segja að slíkt hafi ekki farið vel í marga. Fór það svo að hann baðst afsökunar þegar birti að nýjum degi og lét sig hverfa af X. Talið er ólíklegt að hann muni endast miklu lengur í starfi hjá Flokki fólksins sem á í nægum vandræðum þótt starfsmenn séu ekki til vandræða ...
Athugasemdir