Hæstiréttur Íslands dæmdi brottrekstur úr Félagi fasteignasala ógildan árið 2001 en sagt var frá málinu í DV.
Forsaga málsins er sú að Finnboga Kristjánssyni fasteignasala var vikið úr félaginu af stjórn þess en að sögn hennar var það gert eftir kvartanir um vinnubrögð hans í starfi. Finnbogi var ekki sáttur við það og fór í mál við félagið og tók Hæstiréttur það fyrir. Dómurinn taldi að Finnbogi hefði átt að fá áminningu áður en honum var vikið og sagði rétturinn einnig að honum hafi ekki verið gefinn kostur á að tjá sig um málið fyrir stjórn félagsins. Var niðurstaðan því sú að Finnbogi yrði tekinn aftur inn í félagið eða það fengi daglega sekt upp á 10 þúsund krónur þar til.
„Þessi tilraun til úrsagnar er af völdum örfárra einstaklinga innan félagsins,“ sagði Finnbogi Kristjánsson fasteignasali við DV um málið. „Þeir gera þetta án samráðs við félagsmenn og án lagaheimildar. Þeir hafa komið af stað ákveðnum rógburði sem hefur skilað sér til mín. Ég mun vera vel á verði gagnvart þessu. Það verður bara að koma í ljós hvort mér verður vært innan félagsins. Það er kominn tími til að laga til i félaginu og búa til reglur sem farið verður eftir. Þegar ég kom inn í félagið gagnrýndi ég þau vinnubrögð sem voru viðhöfð og ég uppskar þessi viðbrögð.“
Tók mörg ár
„Félagið verður að hlíta þessum úrskurði,“ sagði Kristín Árnadóttir, formaður Félags fasteignasalar. „Ég mótmæli því harðlega að manninum hafi verið vikið úr félaginu vegna ákvörðunar örfárra einstaklinga. Þetta mál hefur verið í gangi í mörg ár og að því komið margir aðilar, þ. á m. lögfræðingar sem fleiri en ein stjórn hafa ráðfært sig við. Ákvörðunin um að setja hann út úr félaginu var tekin vegna síendurtekinna kvartana og athugasemda vegna starfa hans. Þær voru alvarlegar, enda lítur Hæstiréttur þær alvarlegum augum eins og kom fram í dómnum.“
Þá þótti Kristínu skrýtið að Finnbogi vildi vera í félagi sem hann gerði svo miklar athugasemdir við.
Athugasemdir