Í dag sendir kvikmyndagerðarfólk alþingismönnum áskorun ásamt undirskriftalista vegna slæmrar stöðu Kvikmyndasjóðs. Alls hafa 744 manns skrifað undir listann á örfáum dögum
Eftirfarandi bréf var í dag sent á alla þingmenn Alþingis:
Ágæti þingmaður.
Hér kemur áskorun frá fagfólki í kvikmyndagerð vegna slæmrar stöðu Kvikmyndasjóðs sem hefur verið skorinn mikið niður á undanförnum árum.
Samkvæmt fjárlagafrumvarpinu verður sjóðurinn árið 2025 á sama stað og hann var árið 2006. Þessi afturför er þegar farinn að hafa alvarlegar afleiðingar fyrir framleiðslu íslenskra kvikmynda.
Við erum með einfalda hugmynd sem leysir málið að sinni og mun skila meiri tekjum en kostnaði eins og fram kemur í áskoruninni. Hugmyndin er að færa 500 milljónir úr endurgreiðslunni og inn í Kvikmyndasjóð.
Fjárlög gera ráð fyrir að endurgreiðslur vegna kvikmynda verði 6 milljarðar á næsta ári. Sú tala er áætlun og ef endurgreiðslurnar verða minni er skaðlaust að færa fjármuni af þeim lið yfir í Kvikmyndasjóð þar sem þeir munu skila góðum arði.
Ef hins vegar verða meiri erlend umsvif í kvikmyndaframleiðslu en fjárlög gera ráð fyrir þarf ríkisstjórnin að leggja fram fjáraukalög til að stoppa í gatið. Það hefur oft verið gert enda áhættulaust því ríkissjóður verður þá þegar búinn að fá greiddar allar tekjur af þessari framleiðslu – og þær eru meiri en endurgreiðslan – svo skaðinn er enginn.
Þessi tillaga er lögð fram til þess að leysa fjárhagsvanda Kvikmyndasjóðs fyrir árið 2025 en um leið köllum við eftir aðgerðum svo hægt verði að byggja upp sjóðinn til framtíðar þannig að þessi afleita staða komi ekki upp aftur.
Undir meðfylgjandi áskorun til þín hafa, á nokkrum dögum, skrifað 717 manns sem starfa í kvikmyndagerð á Íslandi.
Við vonum að þú leggir okkur lið nú þegar við þurfum virkilega á því að halda.
Sá stuðningur mun ekki gleymast.
Bestu kveðjur,
Aníta Briem – leikkona
Benedikt Erlingsson – leikstjóri
Björn B Björnsson – leikstjóri & framleiðandi
Grímur Hákonarson – leikstjóri
Hafsteinn Gunnar Sigurðsson – leikstjóri
Hildur Guðnadóttir – tónskáld
Hrafnhildur Gunnarsdóttir – leikstjóri
Hrönn Sveinsdóttir – framkvæmdastjóri Bíó Paradís
Nína Dögg Filippusdóttir – leikkona
Rúnar Rúnarsson – leikstjóri
Athugasemdir