„Mikið megum við vera þakklát fyrir þá stórkostlega vel heppnuðu þætti um líf elsku Vigdísar okkar allra, sem haldið hafa okkur hugföngnum undanfarin sunnudagskvöld.“ Þannig hefst lofræða Jakobs Frímanns Magnússonar um þættina um Vigdísi Finnbogadóttur, sem slegið hafa í gegn að undanförnu.
Jakob stingur upp á því að RÚV geri sérstakan samning við Vesturport, sem gerði þættina um Vigdísi, um árlegar þáttaraðir af svipuðu meiði.
„Enn ein fjöður í hatt Vesturportsfólksins sem RUV mætti nú gjarnan ganga til samninga við um árlegar þáttaraðir af svipuðum toga – samtímasögur sem snerta okkur, mennta og skemmta í senn. Hér er verið að svara vaxandi eftirspurn áhorfenda eftir upplifunum sem á ensku eru nefndar EDUTAINMENT – og á íslensku mætti nefna SKEMMTIMENNT.“
Stuðmaðurinn á Alþingi telur síðan upp hvað honum fannst svona gott við þættina en það er bókstaflega allt:
„Allt small hér sem best mátti verða:
Stórleikur Nínu Daggar og Elínar Hall, Eggerts Þorleifssonar, Hönnu Maríu og allra hinna, frábær handritsgerð og leikstjórn, kvikmyndataka, speglun tíðaranda í leikmynd, búningum og öðru.“
Að lokum þakkar hann fráfarandi dagskrárstjóra RÚV fyrir þættina:
„Hafi þetta verkefni markað lokapunkt á farsælum ferli Skarphéðins Guðmundssonar fráfarandi dagskrárstjóra RUV, þá hlýtur þetta að vera afar gefandi hápunktur að kveðja með. Hjartanlega til hamingju aðstandendur allir, RUV, Stefán Eiríksson og Skarphéðinn Guðmundsson! Takk fyrir okkur og meira svona!!“
Athugasemdir