Símon Vestarr Hjaltason, frambjóðandi í öðru sæti Sósíalista í Reykjavíkurkjördæmi suður, var viðmælandi Hvassra Brúna að þessu sinni.
Símon flutti lagið Seasons í þættinum sem má finna á smáskífunni Fever Dream eftir hann á Spotify.
Símon er alinn upp í Hvítasunnusöfnuðnum og lærði tólf ára gamall að spila á gítar af föður sínum, Hjalta Gunnlaugssyni, sem má segja að sé goðsögn í heimi kristilegrar íslenskrar tónlistar.
„Kristileg tónlist er í raun popptónlist með Jesútextum; um hvað Jesú er geggjaður!“ segir Símon. Í dag spilar Símon hinsvegar bæði sem trúbador en aðallega með hljómsveitinni Kingkiller sem er hefðbundnari þungarokksrokkshljómsveit. Ásamt Símoni er hljómsveitin skipuð Ásmundi Jóhannssyni trommuleikara, syni Jóhanns Ásmundssonar sem spilaði meðal annars með Mezzoforte, og Ágústi Þór bassaleikara.
Spurður út í trú sína í dag sagði Símon „Ég er svona einhverskonar hippi bara. Þetta er orðið svona pantheismi hjá mér. Ég hef ekki alveg gefið hugmyndina um guðdóminn upp á bátinn en núna finnst mér eins og tilveran sjálf sé guðdómleg og læt bara þar við sitja. Þetta hefur færst kannski svolítið út í búddisma eða eitthvað svoleiðis.“
Þess utan er Símon kennari og vekur athygli nemenda sinna með því að vera alltaf berfættur í vinnunni. Símon segist oft vera í skóm en aldrei í vinnunni, heima eða á sviði, en þetta gerir hann til að ná jarðtengingu.
Athugasemdir