„Jarðböðin við Mývatn eru frábær!“ segir ánægður gestur á Facebook hópnum „Vertu á verði - eftirlit með verðlagi“. Hópurinn hýsir umræðu um verðlag á alls kyns vörum og þjónustu og þó að hópar á miðlum líkt og Facebook séu ekki alltaf þekktir fyrir uppbyggilega umræðu leynast oft jákvæðar færslur þar inni.
Gestur jarðbaðanna deildi reynslu sinni eftir heimsókn í Jarðböðin á Mývatni. Þá sérstaklega hafði gesturinn orð á sanngjörnu verðlagi kaffihússins þar, Kaffi Kvika, en þau seldu croissant með skinku á 500 krónur eða „bakaríis-verði“ samkvæmt færslunni. „Eigendur þess eru ekki að farast úr græðgi og selja bakkelsi á bakarís-verði,“ segir konan sem þar var viðskiptavinur.
Um er að ræða hálfvirði miðað við algengt verð á sambærilegum mat. Hjá kaffihúsakeðjunni Te & kaffi kostar eitt hreint croissant 845 krónur, en 1.045 krónur ef bætt er við skinku, möndlum eða súkkulaði.
Jarðböðin við Mývatn fengu einnig hrós fyrir vinalegt starfsfólk og að vörur þeirra væru merktar fyrst á íslensku og síðan á ensku.
„Ferðaþjónustan er oft frábær en ekki alltaf,“ segir ánægður gestur Jarðbaðanna.
Þrátt fyrir hóflegt verðlag á veitingum ná Jarðböðin við Mývatn að hagnast um gróflega milljón á dag. Í fyrra var hagnaðurinn 325 milljónir króna og árið þar áður 417 milljónir króna.
Stærsti eigandi Jarðbaðanna við Mývatn er íslenska ríkið í gegnum Landsvirkjun með um fimmtungshlut. Þar á eftir kemur dótturfélag Bláa lónsins, Íslenskar heilsulindir ehf. Af einstökum eigendum er þekktastur Grímur Sæmundsson, tengdur við Bláa lónið, með 8,8% hlut.
Athugasemdir