Lögreglan á Vestfjörðum og Landhelgisgæslan hafa gripið til aðgerða eftir að myndband af ísbirni á ísbreiðu, um 50 sjómílur út af Straumnesi á Hornströndum, vakti athygli á samfélagsmiðlum.
Myndbandið, sem tekið var um borð í íslensku fiskiskipi, barst lögreglu miðvikudaginn 30. júlí. Stuttu síðar tilkynnti hún stjórnstöð Landhelgisgæslunnar um málið og óskaði eftir þyrluflugi til eftirlits á svæðinu.
Síðar kom þó í ljós að myndbandið var þriggja vikna gamalt. Þrátt fyrir það hefur verið ákveðið að senda þyrlu yfir Hornstrandir til að tryggja öryggi ferðamanna og annarra sem þar dvelja.
Lögreglan hefur jafnframt gert landverði í Hornstrandafriðlandi og ferðaþjónustufyrirtæki á svæðinu viðvart og hvetur til sérstakrar aðgæslu.
Í tilkynningu lögreglunnar segir að ástæða sé til að almenningur sýni varúð, þar sem ísbirnir geta synt langar leiðir og óljóst er hvaðan björninn á myndbandinu kom.
Lögreglan og Landhelgisgæslan hvetja fólk til að tilkynna tafarlaust ef það verður vart við ísbirni svo tryggja megi öryggi fólks á svæðinu.
Athugasemdir