Hlaðvarpið Morðcastið hefur ákveðið að láta áskriftartekjur sínar í september renna til UNICEF, til stuðnings börnum í Palestínu. „Allar áskriftatekjur okkar í september renna óskertar til UNICEF, eyrnamerktar í aðstoð við börn í Palestínu,“ segir Unnur Arna Borgþórsdóttir, sem heldur hlaðvarpinu úti ásamt systur sinni, Bylgju, í samtali við Austurfrétt.
Hún segir hugmyndina sprottna af fyrirmynd frá dönsku prjónafyrirtæki sem gefur reglulega sölutekjur sínar til góðgerðarmála. „Þetta fyrirtæki hefur ákveðna daga þar sem allar tekjur frá þeim degi renna óskertar til ákveðins málefnis. Þar kviknaði hugmyndin,“ segir Unnur Arna.
Unnur Arna tók nýverið þátt í mótmælafundi gegn hernaði í Palestínu á Egilsstöðum undir yfirskriftinni „Þjóð gegn þjóðarmorði“, þar sem hún stýrði fundi og las ávarp frá íbúum í Palestínu. Hún lýsir stöðugu áfalli vegna frétta þaðan: „Þetta hefur verið hræðilegt. Þetta eru orðnir yfir 700 dagar af þjóðarmorði sem er sturlað að við horfum á nánast í beinni.“
„Þess vegna fórum við að hugsa um hvað væri það minnsta sem við gætum gert. Við erum að koma aftur úr smá fríi og fannst rétt að taka fyrsta mánuðinn eftir það í þetta,“ bætir hún við.
Viðbrögð áskrifenda Morðcastsins hafa verið jákvæð, segir Unnur Arna: „Við eigum afar góðan og dyggan hóp áskrifenda sem hefur tekið vel í þetta. Við opnuðum meira að segja sérstakan reikning því fólk vildi styrkja aukalega.“
Hér eru upplýsingar fyrir þá sem vilja styrkja beint:
541020-0710
0357-13-001159
Athugasemdir