Anna Kristjánsdóttir, vélstjóri og húmoristi búsett á Tenerife, heldur áfram að gleðja fylgjendur sína með daglegum skrifum sínum þar sem hún blandar saman minningum, gamansemi og kaldhæðni um daglegt líf. Í nýjustu færslu sinni, merkt „Dagur 2270 – Styttist í veturinn“, ræðir hún bæði elliglöp, veður, sjósögur og væntanlega gestakomur.
Segist hún í færslunni hafa tekið eftir kólnandi veðri á eyjunni:
„Það er ekki laust við að það sé byrjað að kólna á kvöldin og einhverjir hafa haft á orði við mig að það þurfi að hafa með sér létta yfirhöfn ... Sjálf hefi ég ekki farið á barinn síðan um helgina því enginn nennir lengur að drekka með mér og hlusta á gamlar lygasögur af lífinu til sjós í gamla daga í tuttugasta sinn eins og af Halaveðrinu mikla árið 1925 eða þegar ég hjálpaði Ingólfi heitnum að varpa öndvegissúlunum fyrir borð fyrir suðaustan land og þær rak á móti straumi fyrir Reykjanesið og inn á Faxaflóann og alla leið til Reykjavíkur.“
Rifjar hún upp kyrrsetningu skipsins Álafoss (II) árið 1985 en tollverðir fundu „galtómt leynihólf“ um borð. „Nokkrum dögum síðar kom Tollgæslustjóri í fjölmiðla og hélt því fram að nokkrar sjóreknar myndbandsspólur sem rak á land nærri Akranesi væru hluti af smyglinu sem ekki fannst. Þær voru reyndar orðnar svo gamlar að böndin í þeim voru uppétin. Sjálf var ég ekki um borð þegar umrædd leit átti sér stað auk þess sem að mér hefði ekki komið til hugar að eyða dýrmætu smyglplássi í að fela myndbandsspólur, ekki einustu svæsnustu klámspólur þó að ónefndir tollverðir hefðu alveg viljað fá þær lánaðar. Engin nöfn nefnd og ekki dettur mér til hugar að hugsa til Felix Haraldssonar (sic!) í því sambandi.“
Anna segir þetta þó vera útúrsnúning hjá sér og heldur áfram að tala um komandi vetur á sólareyjunni Tenerife:
„Þrátt fyrir kólnandi veðurfar er ég enn ekki farin að troða sænginni inn í sængurverið auk þess sem að ég hefi sofið nakin undir sængurverinu í allt sumar. Það verður þó breyting þar á innan þriggja vikna þegar ég á von á kærum gesti ... þá verð ég að sjálfsögðu að gæta velsæmis og pakka mér inn í náttkjól.“
Athugasemdir