Að minnsta kosti 38 námumenn létust og 27 til viðbótar slösuðust þegar gasspreningin varð í dag í blýnámu í Plateau-ríki í miðhluta Nígeríu, samkvæmt heimildum sem ræddu við Agence France-Presse (AFP).
Sprengingin átti sér stað við Kampanin Zurak námusvæðið í Bashar-héraði snemma morguns. Samkvæmt upplýsingum frá starfandi hefðbundnum leiðtoga svæðisins, Alhaji Aliyu Adamu Idris, voru mennirnir staddir neðanjarðar þegar slysið varð.
„Hingað til hafa 38 manns verið staðfestir látnir og um 27 aðrir hafa verið fluttir á sjúkrahús,“ sagði Idris.
Námumaðurinn Ibrahim Dattijo Sani, sem starfar við námu í nágrenninu, sagði að sprengingin hefði orðið á milli klukkan 7:30 og 8:00 að morgni að staðartíma. Hann sagði að björgunaraðgerðir hefðu hafist strax, en reynst erfiðar.
Samkvæmt skýrslu yfirvalda, sem AFP hefur undir höndum, er talið að námumennirnir hafi látist af völdum kolmónoxíðeitrunar.
Sambærileg slys hafa átt sér stað í landinu áður. Í september létust að minnsta kosti 18 manns þegar stór bjarg hrundi yfir ólöglega námu í Zamfara-ríki í norðvesturhluta landsins í kjölfar mikilla rigninga.
Yfirvöld í Nígeríu hafa einnig bent á að ólögleg námuvinnsla hafi aukið skipulagða glæpastarfsemi en slík gengi innheimta verndargjöld af námumönnum.
Athugasemdir