Fallegt og vel staðsett einbýlishús í Grjótaþorpið hefur verið sett á sölu fyrir 189 milljónir króna, jafngildir það 1.410.448 kr./m².
Um er að ræða afar heillandi eign á einum eftirsóttasta stað miðborgarinnar, ásamt bakhúsi sem býður upp á umtalsverða tekjumöguleika.
Samkvæmt upplýsingum úr fasteignaskrá Þjóðskrá Íslands er aðalhúsið við Mjóstræti 10b skráð 71,8 fermetrar að stærð. Húsið var byggt árið 1890 og hefur verið endurnýjað að hluta, meðal annars voru frárennslis- og neysluvatnslagnir endurnýjaðar árið 2005 að sögn fyrri eigenda. Húsið er klætt með innbrenndu áli.
Á lóðinni stendur einnig bakhús við Mjóstræti 10a sem er skráð 62,2 fermetrar. Bakhúsið er bárujárnsklætt og hefur nýlega verið endurhannað með það fyrir augum að hámarka nýtingu. Þar hafa verið útbúnar tvær sjálfstæðar stúdíóíbúðir, hvor með sér baðherbergi og eldhúsaðstöðu. Fyrir framan húsið er góður sólpallur sem nýtist íbúum vel.
Samtals eru eignirnar því skráðar 134 fermetrar og eru á sitt hvoru fastanúmerinu, sem eykur sveigjanleika fyrir væntanlega eigendur. Eignin hentar jafnt sem fjölskylduhúsnæði sem og fjárfesting, með möguleika á leigutekjum af bakhúsinu.
Eignir í Grjótaþorpinu hafa verið eftirsóttar um árabil, enda svæðið þekkt fyrir sjarma sinn, sögulegt gildi og nálægð við miðborg Reykjavíkur.
Athugasemdir