Gunnsteinn Rúnar Gíslason, sem um áratuga skeið gegndi lykilhlutverki í samfélaginu í Árneshreppi á Ströndum, er látinn, 93 ára að aldri. Hann lést á Heilbrigðisstofnun Vesturlands á Akranesi þann 13. apríl síðastliðinn. Mbl.is sagði frá andlátinu.
Gunnsteinn fæddist 4. desember 1932 í Steinstúni í Norðurfirði og var sonur hjónanna Gísla Guðlaugssonar og Gíslínu Vilborgar Valgeirsdóttur. Hann átti þrjá albræður, þá Guðlaug, Ólaf Andrés og Ágúst, auk þess sem Trausti Magnússon og Hilmar Hjartarson ólust upp með honum.
Ungur að árum hóf Gunnsteinn nám, fyrst í Reykjaskóla í Hrútafirði á árunum 1950 til 1952 og síðar í Samvinnuskólanum haustið 1952. Kennarastarf varð hans fyrsta starfsvettvangur, en hann kenndi við Finnbogastaðaskóla í Árneshreppi í fimm ár frá 1955.
Ævistarf hans mótaðist þó einkum af störfum í verslun og sveitarstjórn. Hann var kaupfélagsstjóri Kaupfélags Strandamanna í yfir þrjá áratugi, frá 1960 til 1993, og síðar útibússtjóri Kaupfélags Steingrímsfjarðar í Norðurfirði til ársins 2009.
Gunnsteinn tók sæti í sveitarstjórn Árneshrepps árið 1958 og gegndi embætti oddvita frá 1971. Hann lét af störfum árið 2006 eftir 48 ára samfellt starf í sveitarstjórn. Auk þess sinnti hann ýmsum öðrum störfum í heimabyggð, meðal annars sem hafnarstjóri í Norðurfirði og rekstraraðili gistiheimilisins Bergistanga í aldarfjórðung.
Hann var jafnframt virkur í kirkjustarfi og gegndi formennsku í sóknarnefnd Árnessóknar í áratugi, frá 1986 til 2021. Þá stundaði hann útgerð um langt skeið og gerði út trillur til grásleppu-, skak- og hákarlaveiða allt fram til ársins 2019.
Eiginkona hans var Margrét Jónsdóttir frá Stóru-Ávík, fædd 1939. Þau eignuðust fimm börn: Jón Unnar, Gíslínu Vilborgu, Guðrúnu, Gísla Baldvin og Álfheiði Hildi.
Síðustu ár ævinnar bjuggu Gunnsteinn og Margrét á Akranesi. Minningarathöfn verður haldin í Akraneskirkju næstkomandi mánudag klukkan 13 og útför fer fram í Árneskirkju á Ströndum 23. apríl, á sumardaginn fyrsta, klukkan 14.
Athugasemdir