Samfylkingarþingmaðurinn Dagbjört Hákonardóttir gagnrýnir harðlega ummæli Jóns Pétusr Zimsen úr Sjálfstæðisflokknum í nýlegum pistli.
Í pistli sinum segir Dagbjört að óviðunandi sé að tengja lækkandi fæðingartíðni við stöðu kvenna í samfélaginu eða halda því fram að aukið rými þeirra í atvinnu- og samfélagslífi sé orsök þróunarinnar. Hún bendir á að fjölmargar rannsóknir sýni að aðrar skýringar vegi þyngra.
Samkvæmt Dagbjörtu sýna greiningar alþjóðlegra stofnana á borð við OECD og Eurofound að stór hluti ungs fólks eignist færri börn en það kýs, einkum vegna fjárhagslegs óöryggis og erfiðleika á húsnæðismarkaði. Þá vísa norrænar rannsóknir til þess að aukið atvinnu- og tekjuöryggi auki líkur á barneignum, sérstaklega þegar kemur að öðru og þriðja barni.
Dagbjört leggur áherslu á að stöðugleiki í efnahagsmálum og bætt aðgengi að húsnæði séu lykilþættir þegar kemur að ákvörðunum fólks um fjölskyldustækkun. Hún gagnrýnir jafnframt stefnu Sjálfstæðisflokksins í efnahags- og húsnæðismálum og telur hana hafa aukið á misskiptingu og þrýsting á húsnæðismarkaði.
Í umfjöllun sinni hafnar hún einnig hugmyndum flokksins um svokallaðar heimgreiðslur og segir þær geta fest konur í fátæktargildru. Þess í stað telur hún mikilvægt að brúa bilið milli fæðingarorlofs og leikskóla með markvissum aðgerðum.
„Það er kominn tími til að skrúfa áfastan tappa á þessa umræðu ef Sjálfstæðisflokkurinn vill njóta trúverðugleika sem frjálslyndur frelsisflokkur.
Ég trúi ekki öðru en sjálfstæðismenn hafni þessari þvælu, og það almennilega. Ég er viss um að það myndi veita þeim lífsfyllingu og tilgang,“ skrifar Dagbjört að lokum.
Athugasemdir