Heiða Björg Hilmisdóttir og Íþaka fasteignir undirrituðu í dag samkomulag um áframhaldandi leigu og stækkun á Fylkisseli um 567 fermetra, að viðstöddum formanni Fylkir en þetta kemur fram í tilkynningu frá borginni.
Húsnæðið við Norðlingabraut 12 er nýtt fyrir fimleika- og karateæfingar á vegum félagsins. Með stækkuninni verður aðstaðan betur í stakk búin til að mæta auknum áhuga á íþróttunum í Árbæjarhverfi og nærliggjandi hverfum, auk þess að styðja við fjölgun iðkenda og íþróttagreina í barna- og unglingastarfi.
Í samstarfsyfirlýsingu meirihluta borgarstjórnar um lífsgæði í Reykjavík er jafnframt lögð áhersla á uppbyggingu íþróttamannvirkja fyrir börn og ungmenni, jafnt aðgengi óháð kyni eða kynhneigð og aukin tækifæri til þátttöku í fjölbreyttu íþrótta- og menningarstarfi, sérstaklega fyrir börn í viðkvæmri stöðu. Stækkun aðstöðu Fylkis fellur vel að þeim markmiðum.
„Stækkun Fylkissels styrkir öflugt íþróttastarf í Árbænum, skapar meira rými fyrir iðkendur og tryggir að fleiri fái tækifæri til að blómstra í hreyfingu, félagsskap og gleði. Þetta er nákvæmlega sú forgangsröðun sem Reykjavík á að standa fyrir, að mínu mati. Það er fagnaðarefni að þessi mikilvægi áfangi sé í höfn,” segir Heiða Björg Hilmisdóttir borgarstjóri.
Athugasemdir