Fimm þorpsbúar sem höfðu setið fastir í flóðum inni í helli í Laos í meira en viku fundust á lífi, en tveggja er enn saknað.
Hópurinn fór inn í helli í Xaisomboun-héraði þann 19. maí, í leit að gulli en miklar rigningar ollu skyndiflóðum sem lokuðu útgönguleiðinni og innilokuðu sjö manns, samkvæmt upplýsingum frá laóskum og tælenskum björgunarsveitum sem tóku þátt í aðgerðinni.
Bounkham Luanglath hjá samtökunum Rescue Volunteer for People sagði að fimm hefðu fundist heil á húfi, en leit héldi áfram að tveimur til viðbótar.
„Ég er enn að skjálfa. Okkar teymi tókst þetta,“ sagði hann í hljóðskilaboðum.
Myndband sem tælensk björgunarsveit birti virðist sýna augnablikið þegar kafarar komu upp úr vatninu og fundu þorpsbúana.
Á myndskeiðinu sjást þeir sitja á kletti umkringdir flóðavatni, allir með höfuðljós.
Reyndu að finna loftgöt inn í hellinn
Björgunarsveitir höfðu áður greint frá því að leit dagsins hefði meðal annars falist í því að kanna loftgöt fyrir ofan hellinn í von um að finna mögulegar leiðir að fólkinu.
Björgunarfólk frá Taíland kom á svæðið um helgina til að aðstoða við aðgerðina.
Meðal þeirra voru kafarar frá nokkrum löndum sem tóku þátt í hinni flóknu björgun árið 2018 þegar tólf skólapiltar og knattspyrnuþjálfari þeirra sátu fastir í helli í norðurhluta Taílands í meira en tvær vikur.
Í leitinni höfðu kafarar farið um 100 metra inn í þröngan, vatnsfylltan hellinn og töldu á þeim tímapunkti að þorpsbúarnir væru 30 metrum lengra inni. Unnið var að því að dæla vatni úr hellinum til að auðvelda björgunaraðgerðirnar.
Erfitt fjalllendi og miklar rigningar
Hellirinn er staðsettur á afskekktu og hrjóstrugu svæði í Longcheng-héraði, um 120 kílómetra norðan við höfuðborgina Vientiane.
Björgunarfólk hefur lýst erfiðum aðstæðum á samfélagsmiðlum, þar sem bæði fjalllendi og miklar rigningar hafa torveldað aðgerðir.
Myndbönd frá tælenskum björgunarsveitum sýna að það tekur um fjögurra kílómetra göngu upp bratta leið að komast að hellisopinu.
Sjálft opið er þröngt, bratt og grýtt og aðeins nægilega breitt fyrir eina manneskju í einu.
Inni í hellinum hafa björgunarmenn þurft að skríða í gegnum þröng göng, drullukennda kafla og vatnsfyllta ganga.
Erfið björgunaraðgerð framundan
Einn kafaranna sem tekur þátt í björguninni er Finninn Mikko Paasi, birti myndskeið sem hægt er að sjá hér fyrir neðan en þar segir hann:
„Þeir sem segja að það sé ekki hægt, ættu ekki að trufla þá sem eru að gera það“
Þvílík tilfinning!!!! ❤️
Eftir viku af erfiðri teymisvinnu fundum við loksins 5 af þeim 7 námumönnum sem saknað var og voru fastir í vatnsflæddri námu í Laos.
Verkefnið hingað til hefur verið allt annað en auðvelt og allir sem að því koma hafa unnið ótrúlegt starf. Takk allir sem tókuð þátt 🙏🙏🙏
Þetta er aðeins skammvinnur léttir þar sem þeir 5 sem lifðu af eru enn í innsta hólfinu, allir heilir á húfi og við góða líðan, en björgunin er enn framundan og hún verður ekki auðveld.
Fyrir mig og @benzscout þýðir þetta að við þurfum að kafa beint aftur inn og færa námumönnunum meiri vistir svo þeir geti safnað kröftum og búið sig undir leiðina út.“
Athugasemdir