Þorgerður Katrín Gunnarsdóttir utanríkisráðherra fundaði í gær með Juraj Blanár, utanríkis- og Evrópumálaráðherra Slóvakíu, sem staddur er hér á landi í opinberri heimsókn. Markmið heimsóknarinnar er að efla samskipti og samstarf Íslands og Slóvakíu á ýmsum sviðum.
Samkvæmt tilkynningu frá stjórnvöldum ræddu ráðherrarnir meðal annars tvíhliða samskipti ríkjanna, Evrópumál og stöðuna í Úkraínu. Þá voru einnig rædd tækifæri til aukins samstarfs, meðal annars á sviði jarðvarmanýtingar og í háskólasamstarfi.
Í tilkynningunni kemur fram að fjölmargir íslenskir nemendur hafi um árabil sótt sér heilbrigðismenntun í Slóvakíu og að möguleikar til frekara samstarfs á því sviði hafi verið til umræðu á fundinum.
Í heimsókn sinni á Íslandi fundaði Blanár einnig með forseta Íslands, Höllu Tómasdóttur, auk þess sem hann átti fund með utanríkismálanefnd Alþingis.
„Það var ánægjulegt að taka á móti Blanár og sjá áhuga hans og stjórnvalda í Slóvakíu á nánara samstarfi við Ísland. Það er margt sem við eigum sameiginlegt með Slóvökum, við erum tvö stórhuga smáríki, við erum bandamenn í Atlantshafsbandalaginu og njótum bæði góðs af Evrópusamstarfi og hinum sameiginlega innri markaði Evrópu. Fjölmargir íslenskir háskólanemar hafa sótt sér heilbrigðismenntun í Slóvakíu og í dag eru yfir 200 nemendur þar í landi. Það er mikill vilji fyrir því að styrkja samstarfið á sviði heilbrigðismála frekar,” sagði Þorgerður Katrín. „Mér þótti það sérstaklega áhugavert að ræða augljós tækifæri til þess að miðla íslenskri sérþekkingu í nýtingu jarðvarma í Slóvakíu. Mér skilst að jarðvarma má finna á um þriðjung landsvæðis þeirra en að ekki sé verið að nýta þannig góða kost til orkuframleiðslu. Þannig að það eru fjölmörg tækifæri til þess að rækta viðskiptasambandið okkar frekar.”
Athugasemdir