„Er „Áfram Ísland!“ í raun og veru „Stopp nú, Ísland!“ hreyfingin?“

Viktor Orri Val­garðs­son, stjórn­mála­fræð­ingur og fyrr­ver­andi vara­þing­maður Pírata, gagn­rýnir and­stæð­inga aðild­ar­við­ræðna við Evr­ópu­sam­bandið í nýrri Facebook-færslu. Hann segir rangt að ætla að vel­megun Íslands sé til komin vegna þess að landið standi utan ESB og veltir því upp hvort ný hreyf­ing gegn við­ræð­unum sé í raun hreyf­ing sem vilji stöðnun.

Viktor bendir á að Ísland sé vissu­lega eitt rík­asta ríki heims án aðildar að Evr­ópu­sam­band­inu, en telur ástæð­una fremur fel­ast í sér­stöðu lands­ins en því að standa utan sam­bands­ins.

„Það er alveg rétt að Ísland er eitt rík­asta land í heimi án þess að vera í ESB. Eflaust er það stór hluti ástæð­unnar fyrir því að við (og Noregur og Sviss) höfum ekki farið þangað inn enn: hvat­inn er ekki jafn­sterkur og hjá mörgum öðrum ríkjum og ótt­inn við að missa for­rétt­indin sem við fengum við það að fæð­ast á þessu landi er skilj­an­legur,“ skrifar hann.

Hann segir því næst að það sé vill­andi að halda því fram að auð­legð Íslands stafi af því að landið sé ekki í Evr­ópu­sam­band­inu.

„Það þýðir ekki að við séum rík vegna þess að við erum ekki í ESB eða að það myndi breyt­ast við aðild (eins og mér heyr­ist Ólafur Ragnar og fleiri vera að gefa í skyn) – við erum í stuttu máli rík út af fiski í kringum landið, ein­stakri nátt­úru sem laðar að sér ótal ferða­menn, heppni með nágranna og svo aðild okkar að EES,“ segir hann.

Viktor telur að aðild að Evr­ópu­sam­band­inu gæti bætt lífs­kjör enn frekar, meðal ann­ars með stöðugri gjald­miðli, lægri vöxtum og verð­bólgu og auk­inni sam­keppni á mat­vöru­mark­aði. Hann vísar meðal ann­ars til skýrslu Hag­fræði­stofn­unar Háskóla Íslands frá 2009 um hugs­an­leg áhrif á mat­væla­verð.

„En það þýðir ekki að við gætum ekki haft það enn betra ef við værum aðilar að ESB og fengjum líka stöðugan gjald­miðil og vænt­an­lega lægri vexti og verð­bólgu með stuðn­ingi Seðla­banka Evrópu, sem og sam­keppni á mat­vöru­mark­aði sem væri lík­leg til að lækka t.d. verð á kjúklingi um ca. 70% og verð á svína­kjöti, mjólk­ur­vörum og eggjum um ca. 35-60% (skv. skýrslu Hag­fræði­stofn­unar HÍ frá 2009).“

Í lok færsl­unnar gagn­rýnir hann nýja hreyf­ingu sem ber nafnið „Áfram Ísland!“ og spyr hvort hún sé í raun and­víg breyt­ingum.

„Af hverju megum við ekki hafa það betra en við gerum í dag, þó svo við höfum það nokkuð gott miðað við aðrar þjóðir? Er „Áfram Ísland!“ hreyf­ingin í raun og veru „Stopp nú, Ísland!“ hreyf­ingin? „Við höfum það nógu gott nú þegar! Við megum ekki við meir...““ skrifar Viktor Orri.