Donald Trump Bandaríkjaforseti segist vilja að Bandaríkin haldi heimsmeistaramótið í knattspyrnu á ný og hefur þegar kynnt FIFA-forsetanum Gianni Infantino hugmynd sína um hvernig það geti orðið að veruleika.
Trump sagði í viðtali við Fox Sports að hann hefði lagt til að tvö lönd yrðu áfram sameiginlegir gestgjafar mótsins.
„Ég fékk frábæra hugmynd fyrir Gianni. Ég sagði honum að hafa tvö lönd sem gestgjafa. Við kynnum okkur sjálf fyrst og svo hitt landið. Það myndi draga úr reiði og áfalli,“ sagði Trump.
Heimsmeistaramótinu sem lauk nýverið var haldið í Bandaríkjunum, Mexíkó og Kanada.
Að mati Trump tókst mótið afar vel.
„Þegar Gianni (Infantino) kynnti þessa hugmynd fyrst sagði ég að hann væri brjálaður, því við værum ekki knattspyrnuþjóð. En það kemur í ljós að við erum það. Þetta hefur verið stórkostlegt,“ sagði hann.
Trump sagði að fólk hefði flykkst til Bandaríkjanna hvaðanæva úr heiminum og eytt þar miklum fjármunum.
„Fólk hefur komið alls staðar að úr heiminum og eyðir peningunum sínum hér. Ég kalla þetta gullöld Bandaríkjanna. Heimsmeistaramótið hefur sannarlega hjálpað til við það og ég heyri að tekjurnar hafi aldrei verið meiri.“
Forsetinn sagðist því vilja fá mótið aftur sem fyrst.
„Miðað við þessar tölur ætlum við strax að sækjast eftir því að halda mótið aftur. Við verðum að gera þetta aftur og við verðum að gera það á meðan ég er enn með í myndinni.“
Þess má geta að HM er haldið á fjögurra ára fresti.
Athugasemdir