Leikritaskáldið og rithöfundurinn Ólafur Haukur Símonarson segir að Bandaríkin hafi ítrekað sýnt að gríðarleg fjárfesting í hergögnum tryggi ekki sigur í stríði. Þetta kemur fram í Facebook-færslu þar sem hann fjallar um átök Bandaríkjanna og Írans.
Í færslunni bendir Ólafur Haukur á að Bandaríkin hafi varið „óskaplegu fé“ í framleiðslu hergagna og nefnir meðal annars flugmóðurskip og orrustuflugvélar sem dæmi um dýran hernaðarbúnað. Þrátt fyrir það telur hann að Bandaríkin hafi borið lægri hlut í flestum þeim átökum sem þau hafi tekið þátt í frá lokum síðari heimsstyrjaldarinnar.
Hann nefnir Kóreustríðið, Víetnamstríðið og stríðið í Afganistan sem dæmi og segir nú blasa við svipuð staða í átökunum við Íran.
„Það sem lítur verst út er að hin rándýru herskip, trilljónaþoturnar og allt sprengiregnið virðist engan gæfumun gera í átökunum,“ skrifar hann og heldur því fram að Íranir hafi enn yfirráð yfir Hormússundi.
Ólafur Haukur gagnrýnir jafnframt Donald Trump Bandaríkjaforseta harðlega.
„Veslings Trump vakir allar nætur og póstar einhverja vitleysu út í loftið, greinilega örvæntingarfullur,“ skrifar hann og bætir við að forsetinn sé „illa upplýstur maður og skilji hvorki upp né niður í neinu“.
Að mati Ólafs Hauks hafi átökin sýnt að hernaður snúist ekki fyrst og fremst um verðmæti vopna.
„Hernaður snýst ekki um dýrmæti hergagnanna, heldur vitið í kollinum, að beita kænsku og því sem handbært er; heyja stríðið á sínum forsendum en ekki forsendum óvinarins,“ segir hann.
Hann segir jafnframt að Bandaríkjamenn hafi ekki lært af fyrri átökum og dregur þá ályktun að „enginn geti sigrað þjóð sem vill lifa á sínum eigin forsendum, hversu góðar, slæmar, illar og heimskulegar sem þær kunna að virðast.“
Í lok færslunnar beinir Ólafur Haukur sjónum að Íslandi. Hann segir Íslendinga þurfa að velta fyrir sér hversu viðkvæmar bandarískar herstöðvar geti verið fyrir ódýrum drónum og eldflaugum og nefnir varnarsvæðið á Miðnesheiði sem dæmi.
„Togari með tíu dróna innanborðs gæti þurrkað herstöðina og flugvöllinn út á dagsstundu,“ skrifar hann.
Athugasemdir