55 ára karlmaður hefur verið handtekinn í Mystras á Pelópsskaga í Grikklandi eftir að lík föður hans fannst í frystikistu í kjallara yfirgefins hótels en greint er frá þessu í grískum fjölmiðlum.
Maðurinn er grunaður um að hafa leynt andláti föður síns í tvö og hálft ár til þess að geta áfram tekið við lífeyrisgreiðslum hans.
Málið komst upp eftir að lögreglan í Lakoníu fékk upplýsingar um að faðir mannsins, sem fæddist árið 1936, hefði ekki sést um langt skeið. Sonurinn var kallaður til skýrslutöku og hélt því fram að faðir hans hefði flutt til Aþenu og byggi þar.
Lögregla hafði í kjölfarið samband við systur mannsins, sem búsett er í Aþenu. Hún sagðist ekki hafa séð föður sinn árum saman og að síðast þegar hún vissi hefði hann búið hjá bróður hennar.
Lögreglumenn fóru þá ásamt dómara í lokað hótel í eigu 55 ára mannsins, en hann hafði sjálfur notað húsnæðið sem heimili. Við leit í kjallara hússins fannst lík föðurins í frystikistu. Einnig fannst þar loftskammbyssa.
Eftir handtökuna viðurkenndi maðurinn að faðir hans hefði látist af náttúrulegum orsökum fyrir um tveimur og hálfu ári. Hann sagðist hafa ákveðið að tilkynna ekki um andlátið svo hann gæti haldið áfram að fá lífeyrisgreiðslur föður síns.
Réttarmeinafræðingur og tæknideild lögreglunnar í Spörtu voru kölluð á vettvang og hefur verið fyrirskipað að krufning fari fram til að staðfesta dánarorsök mannsins.
Rannsókn málsins er í höndum rannsóknar- og sakamáladeildar lögreglunnar í Spörtu.
Athugasemdir