Tveir létust, þar á meðal fimm mánaða gömul stúlka, þegar bát hvolfdi skammt frá Frelsisstyttunni í New York-höfn á laugardagskvöld. Alls voru 14 manns um borð í bátnum þegar slysið varð.
Bandaríski miðillinn TMZ greinir frá þessu og hefur upplýsingarnar eftir heimildarmönnum innan lögreglunnar í New York.
Slysið varð undan ströndum Liberty Island, þar sem Frelsisstyttan stendur. Báturinn hvolfdi skyndilega með þeim afleiðingum að allir 14 sem um borð voru féllu í sjóinn.
Björgunarsveitir lögreglunnar í New York brugðust hratt við eftir að tilkynning barst um bát sem hefði hvolft. Þyrlusveit og hafnardeild lögreglunnar voru sendar á vettvang auk kafara.
27 ára kona og fimm mánaða gömul stúlka fundust í lífshættu og voru fluttar á sjúkrahús í Brooklyn. Þær voru síðar úrskurðaðar látnar.
Hinir tólf sem voru um borð í bátnum voru einnig sóttir úr sjónum af björgunaraðilum. Þeir voru fluttir á sjúkrahús til aðhlynningar en meiðsli þeirra eru ekki talin lífshættuleg.
Ekki liggur fyrir hvað varð til þess að bátnum hvolfdi. Lögregla hefur hafið rannsókn á tildrögum slyssins.
Athugasemdir