Óhætt er að segja að líflegar umræður hafi skapast á Facebook-síðu Stefáns Pálssonar, varaborgarfulltrúa Vinstrisins, eftir að hann gerði upp þjóðaratkvæðagreiðsluna sem fram fór á laugardag.
Stefán, sem studdi nei-hliðina, segir að þrátt fyrir niðurstöðu kosninganna hafi gleðin látið á sér standa.
„Svo ég segi það strax, þá hélt ég að ég yrði glaðari þegar sigurinn yrði í höfn. En ég varð ekkert sérstaklega kátur. Í raun upplifði ég ekki annað en hálfgerða tómleikatilfinningu,“ skrifar Stefán.
Hann segist hafa verið feginn niðurstöðunni en jafnframt leiður yfir því að efnt hafi verið til kosninganna, sem hann lýsir sem „ónauðsynlegum óvinafagnaði“. Kosningabaráttan hafi neytt andstæðinga þess að halda saman þrátt fyrir mikinn pólitískan ágreining þeirra á milli.
Stefán gagnrýnir jafnframt ríkisstjórnina og ráðherra hennar harðlega fyrir framgöngu þeirra í aðdraganda kosninganna. Hann segir ráðherra hafa tekið virkan þátt í baráttunni fyrir já-hliðina og sakar þá um að hafa „gaslýst“ fólk með því að gefa í skyn að ólýðræðislegt væri að kjósa á annan veg.
Margir láta Stefán heyra það
Fjölmargir tóku til máls í athugasemdum við færsluna og voru skoðanir skiptar.
Stærðfræðingurinn Einar Steingrímsson sagði niðurstöðuna meðal annars sýna hversu mikil samstaða væri að hans mati milli forystu Vinstri grænna og Sjálfstæðisflokksins.
Ólína Kjerúlf Þorvarðardóttir, rektor Háskólans á Bifröst, túlkaði tómleikatilfinningu Stefáns með öðrum hætti.
„Þú ert sem sagt með óbragð í munni og þess vegna orðinn pirraður út í kosninguna sjálfa. Það þýðir að innst inni er þér ljóst að NEI-ið var röng ákvörðun út frá framtíðar hagsmunum þjóðarinnar,“ skrifaði Ólína.
Karen Kjartansdóttir gerði einnig athugasemd við þátttöku Stefáns í kosningabaráttunni og vísaði með kaldhæðnum hætti til samkomu þar sem lagið Öxar við ána var sungið.
Snærós Sindradóttir, framkvæmdastjóri Evrópuhreyfingarinnar, var einnig hvöss í garð Stefáns.
„Svona fer sagan með menn sem svíkja sín prinsipp, kæri Stefán. Þessi tómleikatilfinning er sektarkennd,“ skrifaði Snærós.
Arndís Anna Kristínardóttir Gunnarsdóttir, fyrrverandi þingmaður, velti sömuleiðis fyrir sér hvort fleiri kjósendur sem greiddu atkvæði gegn áframhaldandi aðildarviðræðum upplifðu svipaða tilfinningu.
„Mig grunar að mörgum sem sögðu nei sé tómlegt innanbrjósts eftir niðurstöðuna. Það verður áhugavert að sjá könnunina um það hversu mörg sjái eftir atkvæði sínu,“ skrifaði Arndís Anna.
Stefán sagði sjálfur að hann hefði að mestu sloppið við persónulegt skítkast í kosningabaráttunni. Hann sagði hins vegar konur og ungmenni sem hann þekkti hafa orðið fyrir svívirðingum og linnulausu skítkasti, sem hann sagði „óskaplega vesælt“.
Athugasemdir