Dexter Keaton White minnist móður sinnar, leikkonunnar Diane Keaton, með tilfinningaþrunginni kveðju á fyrsta ári frá andláti hennar. Keaton, sem hlaut Óskarsverðlaun á ferli sínum, lést 79 ára að aldri.
„Eitt ár án þín, mamma,“ skrifaði Dexter í Instagram-færslu 10. október. Með færslunni birti hún svarthvíta mynd af þeim mæðgum frá fyrri tíð.
„Á einhvern hátt líður mér eins og þetta hafi gerst í gær og fyrir heilli eilífð í senn,“ skrifaði Dexter.
Hin þrítuga Dexter á enn erfitt með að sætta sig við að móðir hennar sé ekki lengur til staðar.
„Ég er enn að reyna að venjast heimi þar sem ég get ekki hringt í þig, fengið faðmlag frá þér eða farið í ævintýraferðir með þér,“ skrifaði hún.
Hún bætti við að það væru hversdagslegu augnablikin sem minntu hana hvað mest á hversu mikið hún óskaði þess að móðir hennar væri enn á lífi.
Í lok kveðjunnar skrifaði hún: „Ég elska þig og sakna þín. Alltaf.“
Birti mynd frá brúðkaupinu
Samhliða minningarkveðjunni rifjaði Dexter upp fallega stund með móður sinni og birti mynd af þeim frá brúðkaupi sínu og Jordan White árið 2021.
Á myndinni klæðist Dexter hvítum brúðarkjól en Diane er með sinn einkennandi hatt og sólgleraugu og klæðist buxnadragt. Þær brosa hvor til annarrar og horfast í augu.
Kveðjan birtist nákvæmlega ári eftir að Diane Keaton lést, 79 ára að aldri, eftir að hafa glímt við lungnabólgu.
Frá andláti móður sinnar hefur Dexter ítrekað minnst hennar á samfélagsmiðlum. Meðal annars birti hún færslu á fyrsta mæðradeginum eftir andlátið.
„Fyrsti mæðradagurinn án þín,“ skrifaði hún í Instagram-færslu 10. maí. „Ég sakna þín meira en orð fá lýst. Ég sakna raddarinnar þinnar, faðmlaganna, nærverunnar og alls þess sem gerði heimilið að heimili.“
Diane var sátt við að vera einstæð móðir
Diane Keaton varð móðir seint á ævinni og talaði reglulega um ákvörðun sína um að ala börnin upp sem einstæð móðir. Diane ættleiddi Dexter árið 1996 og son sinn, Duke, árið 2001.
Í viðtali við Ladies’ Home Journal árið 2008 lýsti hún því hvernig hún hefði tekið ákvörðunina.
„Móðurhlutverkið var ekki einhver óviðráðanleg þrá sem ég gat ekki staðist,“ sagði hún. „Þetta var frekar hugmynd sem ég hafði velt fyrir mér í mjög langan tíma. Svo lét ég slag standa.“
Athugasemdir