Leikarinn Tom Welling, sem er þekktastur fyrir hlutverk sitt sem Clark Kent og Superman í sjónvarpsþáttunum Smallville, vakti mikla athygli á samfélagsmiðlum eftir að hann birti óvart nektarmynd af sér á Instagram og mátti sjá getnaðarlim hans greinilega.
Welling er staddur í New York vegna Comic Con ráðstefnunnar þar í borg. Hann birti mynd af útsýni yfir hina þekktu borgarlínu New York í Instagram sögu sinni en virðist ekki hafa tekið eftir eigin spegilmynd þegar myndin var tekin. Í spegluninni mátti sjá leikarann nakinn.
Mistök leikarans vöktu fljótt mikla athygli og myndin fór á flug á samfélagsmiðlum. Welling virðist þó hafa tekið uppákomunni með léttleika og hefur meðal annars deilt áfram bröndurum og myndum sem gerðar hafa verið í kjölfarið.
Leikarinn Michael Rosenbaum, sem lék Lex Luthor á móti Welling í Smallville, ákvað að gera góðlátlegt grín að vini sínum. Hann birti sína eigin útgáfu af myndinni þar sem hann stillti sér upp á nærfötunum og skrifaði orðið „perverts“ yfir þann stað þar sem nekt Welling hafði sést í upprunalegu myndinni.
Welling deildi færslu Rosenbaum áfram og setti lagið Empire State of Mind með Jay Z og Alicia Keys undir. Þá tók hann þátt í gríninu í athugasemdum og skrifaði að hann hefði komið til borgarinnar til að skoða útsýnið.
Athugasemdir