Kanadískur maður var á mánudag sakfelldur fyrir dýraníð í Las Vegas eftir að hafa stolið flamingófugli af spilavíti þar sem hann var í fríi fyrr á þessu ári.
Mitchell Fairbarn, 34 ára, frá miðhluta Ontario í Kanada, á yfir höfði sér allt að fjögurra ára fangelsi fyrir þjófnaðinn. Hann stal fuglinum 3. mars frá Flamingo Las Vegas-hótelinu og spilavítinu.
Fairbarn bar vitni um að hann hefði drukkið á bilinu 30 til 40 bjóra daginn sem þjófnaðurinn átti sér stað. Um klukkan fimm um morguninn ákvað hann að skoða fuglana í aðstöðu spilavítisins þar sem flamingófuglar eru hafðir, samkvæmt frétt sjónvarpsstöðvarinnar KVVU-TV í Las Vegas.
Fairbarn sagði að hann hefði verið ölvaður, svefnvana og í símtali þegar hann fór inn á svæðið til að skoða fugl sem hann taldi hafa „ójafna“ vængi.
Á einhverjum tímapunkti greip hann annan flamingófugl, sem heitir Peachy, um hálsinn. Hann sagðist hafa gert það í „fáránlegu flippi“. Síðan fór hann með fuglinn í lyftu upp á hótelherbergi sitt og skildi hann eftir á ganginum fyrir utan herbergið.
Á myndbandsupptöku af atvikinu heyrist Peachy skrækja þegar Fairbarn grípur fuglinn, samkvæmt breska dagblaðinu The Guardian.
Sérfræðingar báru vitni um að fuglinn hefði orðið fyrir fjaðraskemmdum og blóðmissi vegna meðferðar Fairbarns. Dýralæknir sagði fyrir dómi að Peachy væri nú kvíðnari í návist fólks en áður.
Kviðdómur ræddi málið í nokkrar klukkustundir áður en Fairbarn var sakfelldur fyrir alvarlegt og vægara brot á lögum um dýraníð.
Dómur yfir honum verður kveðinn upp 1. desember. Hann er enn í stofufangelsi í Las Vegas og hefur ekki getað snúið aftur til Kanada frá því hann var handtekinn.
Athugasemdir