Aðgerðarsinnar mótmæltu aðgerðarleysi utanríkisráðherra gagnvart þjóðarmorðinu á Gaza í nótt með því að hella rauðum lit í tjörnina fyrir framan utanríkisráðuneytið í Austurhöfn. Þá rituðu þeir Gaza með rauðum lit á gangstéttina fyrir framan ráðuneytið.
Samkvæmt yfirlýsingu frá aðgerðarsinnunum sem Mannlíf hefur undir höndum, vildu aðgerðarsinnarnir með blóðbaðinu, benda á samsekt ráðafólks í þjóðarmorðinu í Palestínu og fordæma langvarandi aðgerðaleysi stjórnvalda.
„Þá er ráðuneytið hvatt til þess að gera allt hvað það getur til að sækja Íslenska dvalarleyfishafa á svæðinu sem hafa samþykkta fjölskyldusameiningu á Íslandi en sá hópur stækkar ört.“
Þá segir einnig í yfirlýsingunni að önnur lönd Evrópu hafi undanfarið unnið að því að sækja sitt fólk yfir landamærin.
„Önnur lönd Evrópu auk Tyrklands hafa undanfarnar vikur unnið ötullega að þvi að sækja sitt fólk yfir landamærin og koma því í öryggi með aðstoð IOM og Rauða krossins.“
Að lokum spyrja aðgerðarsinnarnir hvort utanríkisráðherra vilji hafa frekara blóðbað á samviskunni.
„Eins og komið hefur fram hyggjast ísraelsk stjórnvöld ásamt BNA rýma Gaza algjörlega. Þetta þýðir að þau sem ekki komast burt með aðstoð annarra þjóða verða öll drepin. Vill utanríkisráðherra hafa slíkt á samviskunni?“
Unnar Már Ástþórsson aðalvarðstjóri á lögreglustöð 1 í Reykjavík staðfesti málið við Mannlíf en hann segir að um klukkan þrjú í nótt hafi rauðri málningu verið hellt í litla tjörn fyrir framan utanríkisráðuneytið og „Gaza“ verið málað í rauðum lit á gangstéttina. Segir hann málið vera í rannsókn en að enginn grunur sé um hverjir hafi verið að verki. Aðspurður hvort málið sé litið alvarlegum augum hjá lögreglunni svaraði Unnar: „Nei, við lítum bara á þetta sem venjuleg eignarspjöll“.
