Karlmaður hefur verið ákærður fyrir stórfellt brot í nánu sambandi eftir að hafa samkvæmt ákæru beitt eiginkonu sína ítrekuðu líkamlegu og andlegu ofbeldi á rúmlega þriggja ára tímabili. Málið er rekið fyrir Héraðsdómi Reykjaness.
Morgunblaðið greinir frá ákærunni.
Samkvæmt ákærunni á ofbeldið að hafa staðið yfir frá desember 2022 til janúar 2026 og ítrekað átt sér stað á sameiginlegu heimili hjónanna. Þar er því lýst að maðurinn hafi slegið og sparkað í höfuð, búk og útlimi konunnar, tekið hana hálstaki og þrengt að hálsi hennar. Í einu tilviki er honum gefið að sök að hafa ýtt henni upp að hurð, tekið hana hálstaki og síðan slegið í hné hennar með hamri.
Í ákærunni kemur jafnframt fram að konan hafi sætt alvarlegu andlegu ofbeldi. Maðurinn er sagður hafa niðurlægt hana, öskrað á hana, talað niður til hennar og kallað hana ýmsum niðrandi nöfnum, meðal annars „apa“ og „hóru“. Afleiðingin hafi verið sú að hún bjó við viðvarandi ógnarástand um árabil.
Konan hlaut samkvæmt ákærunni fjölmarga áverka vegna ofbeldisins.
Maðurinn er einnig ákærður fyrir brot í nánu sambandi gagnvart börnum sínum, en til vara fyrir barnaverndarlagabrot. Ákæruvaldið telur að hann hafi með háttsemi sinni ítrekað ógnað lífi, heilsu og velferð barnanna með því að beita móður þeirra ofbeldi, oft þegar börnin voru á heimilinu eða í návist foreldra sinna.
Í ákærunni segir að börnin hafi búið við viðvarandi ógnarástand og að faðir þeirra hafi með framferði sínu misþyrmt þeim andlega, misboðið þeim og sýnt af sér vanvirðandi og ósiðlegt athæfi sem hafi móðgað þau og sært.
