Alfreð Þór Jóhannesson hefur verið dæmdur í sex mánaða skilorðsbundið fangelsi í Héraðsdómi Reykjavíkur fyrir sérstaklega hættulega líkamsárás eftir að hafa ráðist á annan mann með hafnaboltakylfu í íbúð í Reykjavík í mars árið 2024.
Samkvæmt dómnum kom Alfreð á vettvang ásamt vinkonu sinni eftir að kona hafði óskað eftir aðstoð vegna átaka við þáverandi kærasta sinn. Þegar hann kom inn í íbúðina hófust átök milli mannanna tveggja sem enduðu með því að brotaþolinn hlaut fjölmarga áverka víðs vegar um líkamann.
Brotaþoli bar fyrir dómi að hafa verið sleginn ítrekað með hafnaboltakylfu, meðal annars í höfuð. Læknisvottorð sýndi að hann var með mar og yfirborðsáverka á höfði, hálsi, búk og útlimum. Dómurinn taldi að lögun og dreifing áverkanna samræmdist endurteknum höggum með ílöngu barefli á borð við hafnaboltakylfu.
Alfreð neitaði sök og hélt því fram að hann hefði einungis komið til að verja vinkonu sína og að áverkarnir gætu hafa orðið til í slagsmálum mannanna. Héraðsdómur taldi hins vegar framburð hans ótrúverðugan og lagði meðal annars áherslu á framburð brotaþola, vitna, upptökur úr búkmyndavélum lögreglu og læknisfræðileg gögn.
Við ákvörðun refsingar taldi dómurinn árásina hættulega. Refsingin var ákveðin sex mánaða fangelsi en fullnustu hennar frestað til tveggja ára með skilorði. Jafnframt var hafnaboltakylfan gerð upptæk. Þá var Alfreð gert að greiða brotaþola 600 þúsund krónur í miskabætur auk málskostnaðar.
