Knattspyrnukonan Ingibjörg Sigurðardóttir, landsliðskona Íslands og leikmaður þýska félagsins Freiburg, á von á sínu fyrsta barni.

Ingibjörg greindi frá gleðifréttunum á Instagram þar sem hún sagði að hún og maki hennar ættu von á barni í byrjun árs 2027.

„Allt í einu fékk lífið nýja þýðingu. Við erum svo spennt að verða lítil fjölskylda í byrjun árs 2027. Ég er ótrúlega heppin að hafa svo margar magnaðar konur í kringum mig sem hafa sýnt að móðurhlutverkið og fótboltinn geta farið saman. Ég get ekki beðið eftir að takast á við þessa áskorun,“ skrifaði Ingibjörg.

Ingibjörg, sem er 28 ára, hefur leikið sem atvinnumaður erlendis frá árinu 2018, en hún hefur spilað í Svíþjóð, Noregi, Danmörku og Þýskalandi. Hún gekk til liðs við Freiburg frá danska stórliðinu Brøndby fyrir tæpu ári.

Hún hefur verið lykilmaður í íslenska landsliðinu í tæpan áratug, leikið 86 A-landsleiki og skorað þrjú mörk. Þá hefur hún tekið þátt með Íslandi á Evrópumótunum 2017, 2022 og 2025.