Kínverski listamaðurinn Gao Zhen hefur verið dæmdur í þriggja ára fangelsi fyrir að „móðga hetjur og píslarvotta“ með listaverkum sínum. Mannréttindasamtök greindu frá dómnum á þriðjudag.
Gao, sem er sjötugur, varð þekktur ásamt bróður sínum Gao Qiang á fyrsta áratug aldarinnar fyrir verk sem fjölluðu um viðkvæm málefni í kínverskri sögu, meðal annars menningarbyltinguna, mótmælin á Torgi hins himneska friðar og arfleifð Maó Zedong.
Meðal þekktustu verka þeirra er höggmyndin Mao's Guilt, þar sem Maó er sýndur krjúpandi. Í öðru verki, Execution of Christ, miða nokkrar bronsstyttur af Maó rifflum að Jesú Kristi.
Gao flutti til Bandaríkjanna árið 2022 en var handtekinn í vinnustofu sinni í útjaðri Peking í ágúst 2024 þegar hann var í heimsókn í Kína. Hann var ákærður í júní í fyrra fyrir að hafa móðgað hetjur og píslarvotta.
Samtökin Chinese Human Rights Defenders greindu AFP frá því að Gao hefði á þriðjudag verið dæmdur í þriggja ára fangelsi við dómstól í Sanhe í Hebei-héraði. Um er að ræða þyngstu refsingu sem heimilt er að dæma fyrir brotið.
Mannréttindasamtök segja kínversk stjórnvöld hafa beitt lögum frá árinu 2021 afturvirkt vegna listaverka sem Gao skapaði á árunum 2005 til 2009.
Sarah Brooks, yfirmaður Kínamála hjá Amnesty International, gagnrýndi dóminn og sagði hann sýna vilja stjórnvalda til að fæla aðra frá sjálfstæðri listrænni tjáningu. Enginn listamaður ætti að sæta refsingu fyrir verk sem ögruðu opinberri söguskoðun eða hvettu til gagnrýninnar umræðu um söguna.
Gert er ráð fyrir að Gao ljúki afplánun í ágúst á næsta ári, þar sem gæsluvarðhaldstími hans reiknast með. Hann hyggst áfrýja bæði sakfellingunni og refsingunni.
