Reykvíkingur hefur höfðað mál fyrir Héraðsdómi Reykjavíkur og krefst þess að sér verði veittur lögskilnaður frá eiginmanni sínum, sem er með óþekkt heimilisfang erlendis. Stefna í málinu var birt í Lögbirtingablaðinu.

Konan krefst þess aðallega að lögskilnaður verði veittur en til vara skilnaðar að borði og sæng. Hún segir ómögulegt að ná sambandi við eiginmann sinn og að tilraunir undanfarinna ára til að finna hann hafi ekki borið árangur.

Samkvæmt stefnunni kynntust hjónin erlendis árið 2017 og gengu í hjónaband sama ár.

Hjónin slitu samvistum árið 2020. Síðustu samskipti þeirra voru símleiðis árið 2021 og hefur konan ekki haft samband við eiginmann sinn síðan. Hún veit ekki hvar hann er niðurkominn. Hjónin eiga hvorki börn né sameiginlegar eignir.

Krafa konunnar um lögskilnað byggist meðal annars á ákvæði hjúskaparlaga sem kveður á um rétt maka til lögskilnaðar þegar samvistum hefur verið slitið í að minnsta kosti eitt ár. Þar sem ekki hefur tekist að afla samþykkis eiginmannsins telur hún nauðsynlegt að leita til dómstóla.

Málið verður þingfest í Héraðsdómi Reykjavíkur 29. september.