Anna Kristjánsdóttir, vélstjóri og húmoristi, hefur kvatt Tenerife eftir tæplega sjö ára dvöl á eyjunni.
Í nýrri Facebook-færslu segir Anna frá kveðjustund sem vinahópur hennar hélt áður en hún heldur aftur til Íslands í dag.
„Við hittumst nokkur og kvöddumst í tilefni af því að ég er að yfirgefa Tenerife, flest sem búum hérna sem og nokkrir fastagestir á eyjunni og áttum góða stund saman. Við rifjuðum upp gamlar minningar, gjarnan frá Cóvið tímanum en einnig frá öðrum tímum og skemmtum okkur vel á Babylon,“ skrifar hún.
Anna segir árin á Tenerife hafa verið „yndislegan tíma“ þar sem hún hafi eignast fjölda vina og upplifað bæði gleði og sorg með fólkinu í kringum sig.
„Sum okkar fórum saman í ferðir um eyjuna, héldum afmæli saman, en við tókum einnig þátt í sorgarstundum eins og þegar Gummi á Barnum varð bráðkvaddur, síðar Guðni Már vinur okkar allra og ekki má gleyma Hallgrími sem lést af völdum krabbameins einungis rúmlega fimmtugur að aldri fyrir skömmu síðan,“ segir Anna meðal annars.
Þá nefnir hún sérstaklega þrjú gæludýr sem hún segir að muni standa upp úr í minningunni.
„Að mannfólkinu frátöldu eru þó þrjár persónur sem ég mun sakna öðrum fremur, en þar er um að ræða læðuna Knúsu sem hefur svo sannarlega ýmsa fjöruna sopið, en einnig glaðasta hunds í heimi hans Buddy og ekki má gleyma honum stórvini mínum Texas el Perró,“ skrifar hún.
Anna viðurkennir að hún muni sakna Tenerife mikið en segist þó sannfærð um að hún eigi eftir að snúa aftur til eyjunnar síðar.
„Ég viðurkenni alveg að ég mun sakna Tenerife og reikna fastlega með að ég eigi eftir að koma hingað aftur og aftur áður en yfir lýkur enda er Tenerife eins og Paradís á jörðu,“ segir hún.
Anna segist koma til Íslands nærri miðnætti í kvöld og hyggst hún verja næstu dögum í ýmis erindi og að venjast lífinu á ný í Reykjavík eftir nærri sjö ára dvöl í paradís.
