Grímuverðlaunin voru afhent í 23. skiptið í gærkvöldi. Fjölmargar góðar ræður voru haldnar en sú sem vakið hefur hvað mesta athygli er ræða Birnu Pétursdóttur, sem var verðlaunuð fyrir bestan leik í aðalhlutverki í leikritinu Ungfrú Ísland.
Birna, sem er upprunalega frá Egilsstöðum, hefur jafnt og þétt slegið í gegn síðustu ár og er nú komin í röð fremstu leikkvenna Íslands. Birna, sem er mikill stuðningsmaður Palestínu, var með fallegan keffiyeh-trefil á öxlunum, líkt og leikkonurnar Margrét Vilhjálmsdóttir og Ragnheiður Steindórsdóttir, sem afhentu Birnu verðlaunin. Ræðan byrjaði á orðum um konur í heild sinni.
„Takk kærlega fyrir. Ég átti alls ekki von á þessu,“ sagði Birna í upphafi ræðunnar og hélt áfram. „Sérstaklega ekki í þessum stórkostlega hópi kollega minna. Takk Brynhildur, fyrir að fá mig í húsið. Takk Auður fyrir að skrifa þessar stórkostlega fallegu kvenpersónur sem spretta svo fallega upp úr bókinni þinni. Takk Gréta Kristín, mín gamla vinkona, takk fyrir að taka áhættuna á grínleikkonunni fyrir þetta hlutverk. Það var ótrúlega mikill heiður að fá að túlka Ísey, sem er allar konur, alltaf, held ég. Takk dásamlegi leikhópur og takk Filippía fyrir að dreifa töfradufti hvar sem þú kemur.“
Þegar þarna var komið við sögu í ræðu Birnu, beygði hún af þegar hún leit á Ragnheiði og sagði klökk: „Og svo tókst þú orðin úr mínum munni, en mig langar bara að minna ykkur öll á, að börnin á Gaza eru okkar börn og þar er þar sem hjarta mitt slær núna. Og getum við bara plís gert eitthvað í þessu? Ef ég ætla að nota þennan litla platform sem ég hef þá ætla ég að minna okkur á að börnin á Gaza eru okkar börn og okkur ber skylda að gera eitthvað. Takk fyrir mig og mín miklu forréttindi.“
