Bandarískur veiðimaður slapp naumlega lífs af þegar björn réðst á hann í óbyggðum Alaska í síðustu viku. Maðurinn, Jadon Nicoara, er 27 ára tveggja barna faðir og var á hreindýraveiðum ásamt frænda sínum þegar árásin varð.
Mennirnir voru staddir í skóglendi um 160 kílómetra frá Deadhorse þegar þeir urðu varir við hreyfingu í runnum. Nicoara sneri sér við og sá þá björn hlaupa á miklum hraða beint að sér úr um fimm til sex metra fjarlægð.
Björninn felldi Nicoara og réðst ítrekað á hann. Hann sagði í samtali við bandaríska fjölmiðla að dýrið hefði fyrst bitið í handlegg hans áður en það réðst á andlit hans.
Nicoara lýsti því að hann hefði heyrt beinin í nefinu brotna þegar björninn beit hann ítrekað í andlitið. Á þeirri stundu taldi hann líklegt að hann myndi ekki lifa árásina af.
Frændi hans, Daniel, greip skammbyssu og skaut að birninum. Dýrið sneri sér þá að honum og felldi hann einnig. Daniel lagðist á grúfu, huldi hnakkann með höndunum og þóttist vera látinn. Björninn yfirgaf að lokum vettvanginn.
Daniel, sem er læknir, tókst í kjölfarið að stöðva blæðingar Nicoara að hluta. Mennirnir kölluðu eftir aðstoð en þurftu að bíða í um tvær klukkustundir eftir björgun.
Nicoara var að lokum fluttur með þyrlu á Harborview-sjúkrahúsið þar sem hann þarf að gangast undir aðgerð. Daniel hlaut minni háttar áverka. Söfnun vegna lækniskostnaðar Nicoara hefur þegar skilað tæplega 40 þúsund Bandaríkjadölum.
