Bílaáhrifavaldurinn James Wehr lést í alvarlegu umferðarslysi í Irvine í Kaliforníu aðfaranótt sunnudags. Wehr var 27 ára gamall.
Samkvæmt upplýsingum lögreglu og bandarískra fjölmiðla ók Wehr McLaren-bíl á miklum hraða þegar hann missti stjórn á henni. Bifreiðin hafnaði fyrst á gangstéttarbrún og síðan á tré áður en eldur kom upp í henni.
Lögreglan í Irvine og slökkvilið Orange-sýslu voru kölluð á vettvang vegna tilkynningar um bifreið í ljósum logum. Þegar slökkviliðsmönnum hafði tekist að ráða niðurlögum eldsins fundust Wehr og farþegi bifreiðarinnar látnir inni í henni. Ekki hefur verið greint frá nafni farþegans.
Wehr var þekktur innan bílasamfélagsins og rak South OC Cars and Coffee ásamt föður sínum, Simon Wehr. Fyrirtækið greindi frá andláti hans á Instagram og birti jafnframt mynd af feðgunum saman.
Eiginkona Wehr, Emma, minntist hans einnig með tilfinningaþrunginni færslu á samfélagsmiðlum. Þar lýsti hún honum sem einum besta einstaklingi sem hún hefði kynnst.
Lögregla rannsakar tildrög slyssins.
