Kviðdómur í Chicago í Bandaríkjunum hefur dæmt fjölskyldu írsks starfsmanns Sameinuðu þjóðanna 29 milljónir Bandaríkjadala, jafnvirði um 3,6 milljarða íslenskra króna, í skaðabætur vegna Boeing 737 MAX-flugslyssins í Eþíópíu árið 2019.
Málið höfðaði Naoise Connolly Ryan gegn Boeing, en eiginmaður hennar, Michael „Mick“ Ryan, lést þegar Boeing 737 MAX 8-vél Ethiopian Airlines fórst skömmu eftir flugtak frá Addis Ababa. Allir 157 sem voru um borð létust.
Ryan var 39 ára írskur verkfræðingur. Hann hafði meðal annars sinnt störfum í tengslum við ebólufaraldurinn í Líberíu. Þá hafði hann starfað í Afganistan, Srí Lanka, Nepal og Eþíópíu.
Málið er eitt af síðustu einkamálunum sem enn hafa verið rekin gegn Boeing vegna tveggja mannskæðra slysa Boeing 737 MAX-véla árin 2018 og 2019. Alls létust 346 manns í slysunum tveimur.
Langflestum bótakröfum vegna slysanna hefur verið lokið með sáttum utan dómstóla og hafa fjárhæðir þeirra almennt ekki verið gerðar opinberar. Lögmaður Naoise Ryan sagði hana hins vegar hafa lagt áherslu á að kviðdómur tæki afstöðu til ábyrgðar Boeing.
Boeing hefur áður beðist afsökunar vegna slysanna og viðurkennt að MCAS-stýrikerfi vélanna, sem ætlað var að koma í veg fyrir ofris, hafi átt þátt í báðum slysunum.
Þetta er í annað sinn á skömmum tíma sem kviðdómur í Chicago dæmir háar skaðabætur vegna slyss Ethiopian Airlines. Í maí voru fjölskyldu Samya Stumo, 24 ára Bandaríkjakonu sem lést í sama flugi, dæmdar 49,5 milljónir dala í skaðabætur.
