Sumarið er framundan með öllum sínum ævintýrum, frelsi og löngum dögum. Þessum árstíma fylgja oft gleði, en líka breyttar hversdagsrútínur sem geta skapað áskoranir fyrir börn og ungmenni. Rannsóknir á vegum Reykjavíkurborgar sýna að samvera með fjölskyldunni er einn af sterkustu verndandi þáttunum í lífi ungs fólks. Verndandi þættir samkvæmt þeim eru þeir þættir í umhverfinu sem draga markvisst úr áhættuhegðun og styrkja börn og unglinga í að takast á við áskoranir lífsins.
Áhersla á mikilvægi samveru, heilbrigðs lífsstíls og samstöðu
Reykjavíkurborg hefur sett af stað forvarnaverkefni sem snýr að velferð barna og heitir Verum klár. Markmið verkefnisins er að miðla jákvæðum skilaboðum til ungs fólks og aðstandenda þeirra, með áherslu á mikilvægi samveru, heilbrigðs lífsstíls og samstöðu.
Í þessu verkefni er áherslan að byggja upp seiglu og vellíðan hjá börnum. Þá er mikilvægt að huga að helstu verndandi þáttunum í þeirra daglega lífi sem eru samkvæmt þessu átaki:
- Virkar samverustundir með fjölskyldunni.
- Að foreldrar þekki vini barna sinna og foreldra þeirra.
- Þátttaka barnanna í skipulögðu frístundastarfi.
- Að foreldrar fylgist með hvað börnin eru að gera, hvar þau eru og með hverjum.
- Opinská samtöl um virðingu, heilbrigð samskipti, samþykki og mörk.
- Reglubundnar umræður um samfélagsmiðla og ábyrga skjánotkun.
Öryggi barna í sumar
Þegar skólinn lokar og sumarfríið tekur við og frítíminn eykst tala foreldra og forráðamenn oft um að það reyni meira á þá að finna eitthvað að gera. Samkvæmt verkefninu getur virk þátttaka, skýr rammi stuðlað með afgerandi hætti að öryggi barna sinna í sumar. Þar er nefnt að:
- Vera góðar og sýnilegar fyrirmyndir.
- Setja skýr mörk og ræða hvenær og hvernig börnin koma heim á kvöldin.
- Leyfa ekki eftirlitslaus partí og virða lögbundinn útivistartíma.
- Taka virkan þátt í foreldrasamstarfi og samstöðu í hverfinu.
- Virða og framfylgja lögum um aldurstakmörk varðandi áfengi, vímuefni og nikótínnotkun.
Forvarnir eru samfélagslegt verkefni sem tekst best þegar allir vinna saman. Með því að verja tíma með börnunum okkar og setja þeim kærleksrík mörk gefum við þeim dýrmætan veganesti inn í framtíðina.
Á vefsíðu Verum klár má finna fjölda góðra hugmynda um fjölbreyttar samverustundir fjölskyldunnar. Þar er einnig að finna hlekki á margvíslegt gagnlegt efni sem nýtist fjölskyldum sem vilja gera skemmtilega og uppbyggilega hluti saman í sumar. Fjölskyldur eru hvattar til að kynna sér efnið og nýta það til að skapa öruggar og góðar minningar.
