Héraðsdómur Reykjavíkur hefur dæmt konu í 12 mánaða fangelsi fyrir peningaþvætti og fjársvik. Tveimur mánuðum af refsingunni var frestað skilorðsbundið til tveggja ára, að því gefnu að hún haldi almennt skilorð á þeim tíma.

Konan játaði skýlaust brot sín fyrir dómi.

Samkvæmt dómnum var hún sakfelld fyrir að hafa í júní 2023 tekið við og geymt stolið myndefnistæki, Canon 80D myndavél og Mavic Air 2 dróna, á heimili sínu í Reykjavík. Munirnir voru ávinningur þjófnaðar sem framinn hafði verið sama dag.

Auk þess var hún dæmd fyrir fjársvik eftir að hafa fengið eiganda munanna til að leggja 20 þúsund krónur inn á bankareikning sinn gegn loforði um að afhenda honum myndavélina. Af afhendingu varð hins vegar ekki og nýtti hún fjármunina í eigin þágu.

Þá var hún einnig sakfelld fyrir annað peningaþvættisbrot í maí 2024 þegar hún tók við og geymdi tvo Lenovo X1 Yoga fartölvur og svarta 66°Norður úlpu sem einnig reyndust vera þýfi úr þjófnaði.

Við ákvörðun refsingar leit dómurinn meðal annars til þess að konan hafði áður hlotið dóma fyrir auðgunarbrot. Brotin frá árinu 2023 voru jafnframt talin fela í sér rof á skilyrðum reynslulausnar sem henni hafði verið veitt árið 2022 vegna eldri fangelsisdóms.

Dómurinn taldi játningu hennar og þann tíma sem liðinn var frá hluta brotanna til refsimildunar, en fyrri sakaferill hennar hafði áhrif til refsiþyngingar.