Landsréttur hefur staðfest dóm Héraðsdóms Austurlands yfir Ion Imanol Franco Costa, rúmlega þrítugum spænskum ríkisborgara, sem hlaut tveggja ára óskilorðsbundið fangelsi fyrir nauðgun á hótelherbergi á Austurlandi í desember 2023. Costa var sakfelldur á grundvelli DNA-rannsókna. Austurfrétt sagði frá dóminum.
Málið átti sér stað eftir jólahlaðborð á austfirsku hóteli þar sem brotaþoli var gestur ásamt vinkonu sinni, sem dvaldi þar á vegum vinnustaðar síns. Mikil ölvun var á staðnum og fékk konan aðstoð við að komast upp á herbergi, þar sem hún lagðist til svefns.
Samkvæmt dómnum var nokkur umgangur um herbergið eftir borðhaldið, fólk kom og fór til að spjalla, hlusta á tónlist og drekka. Vitni staðfestu þó að konan hefði sofið fast og ekki tekið þátt í samskiptum á herberginu.
Konan vaknaði eftir miðnætti þegar ókunnugur dökkhærður karlmaður var að brjóta á henni kynferðislega. Hún sagðist hafa frosið af ótta. Maðurinn yfirgaf herbergið, en kom aftur stuttu síðar. Þá hélt konan fast um sængina og lokaði sig inn á baðherbergi þegar hann fór aftur, þar sem hún kallaði eftir hjálp.
DNA-sýni leiddu til handtöku
Lögregla hóf þegar rannsókn og tók DNA-sýni úr níu einstaklingum á staðnum. Rannsókn á laki úr rúminu sýndi yfir tíu sæðisbletti, þar á meðal stórar flekkjamyndanir. Í maí 2024 bárust niðurstöður DNA-greiningar frá Svíþjóð sem tengdu Costa ótvírætt við sæðisblettina. Hann var handtekinn en varið úrskurðaður í farbann eftir yfirheyrslu.
Costa hélt því fram að vinkona brotaþola hefði fróað honum stuttlega og að nokkrir dropar af sæði hefðu borist í lakið án þess að hann hefði haft sáðlát. Vitnisburður hennar og annarra vitna gekk þvert á þær skýringar. Costa hélt jafnframt fram að sæðið hefði getað farið á hönd hans og þaðan á lakið eða í rannsóknarferlinu, en sérfræðingar töldu þær skýringar ólíklegar.
Dómurinn óskilorðsbundinn
Í dómi Héraðsdóms kom fram að brotið væri alvarlegt, brotavilji einbeittur og að Costa ætti sér engar málsbætur. Landsréttur tók undir þessi sjónarmið og taldi frásögn konunnar trúverðuga og skýringar Costa ólíklegar.
Landsréttur staðfesti því tveggja ára óskilorðsbundinn fangelsisdóm. Hins vegar var miskabætur lækkaðar úr 2,2 milljónum króna í tvær milljónir. Costa þarf auk þess að greiða 2,2 milljónir króna í áfrýjunarkostnað, auk þeirra 5,3 milljóna sem hann var áður dæmdur til að greiða í sakarkostnað.
