Edda Björgvinsdóttir dregur hvalveiðimenn, Ólaf Ragnar og aðra andstæðinga Evrópusambandsviðræðna sundur og saman í háði í nýjasta myndbandi Guðríðar gömlu á samfélagsmiðlunum.

Ein ástsælasta leikkona Íslands, Edda Björgvinsdóttir birti í gær myndskeið þar sem hún leikur hina vinsælu Guðríði gömlu en þar ver sú gamla hinn ósmekklega gjörning hvalveiðimanns Kristjáns Loftssonar, sem á dögunum veifaði getnaðarlim langreiðar í átt að blaðamönnum í Hvalfirði, þar sem hvalurinn var verkaður.

Byrjar Guðríður gamla á að segja frá því að systir hennar, hin slompaða Gyða, hafi hlegið sig í rot vegna athæfis hvalveiðimannsins.

„Hún Gyða systir, hún hló svo mikið að hún fékk hnykk á hálsinn og það steinlá yfir hana og hún pissaði á sig út af þessu, það er svo mikið grín í kringum hvalina og ... typp, já allavegana, þetta er svo skemmtilegur húmor! Gyða sagði að vísu að þeir væru allir þarna með lítinn, þeir sem eru að veiða en Gyða er auðvitað frekar orðljót.“

Edda snýr sér síðan að Morgunblaðinu, Ólafi Ragnari Grímssyni og fleirum andstæðingum Evrópusambandsviðræðna Íslands og segir, í gervi Guðríðar:

„Hún [Gyða] er nú á fundi hjá Mogganum, sem við eigum, við sem eigum Ísland. Og Óli. Áfram Óli. Við erum búin að stofna hóp til að koma í veg fyrir að þjóðin, sem er heimsk upp til hópa, fái nokkurn tíma að vita hvað er í boði. Við viljum ekki að þið vitið það því að við vitum að það er allaveg eftirlit og það viljum við ekki! Þannig að ekki láta þjóðina kjósa, bara alls ekki. Þá verður Gyða brjáluð. Hún hryggbrotnar bara.“