Bandarísk yfirvöld rannsaka nú hvort leikkonan Hayden Panettiere hafi látist eftir að hafa tekið oxýkódóntöflu sem talið er að hafi verið blönduð fentanýli. TMZ greinir frá þessu og vísar til heimildarmanna innan lögreglu sem þekkja til rannsóknarinnar.
Samkvæmt heimildum miðilsins er vinnukenning rannsakenda sú að Panettiere hafi tekið töflu að morgni þess dags sem hún lést. Talið er að um hafi verið að ræða oxýkódón sem keypt var á svörtum markaði og mögulega innihélt fentanýl, afar öflugt ópíóíð.
Endanleg dánarorsök liggur þó ekki fyrir og leggja heimildarmenn TMZ áherslu á að niðurstöður eiturefnarannsókna séu enn ókomnar. Þær muni skipta sköpum við að staðfesta eða hrekja kenningu rannsakenda.
Panettiere er sögð hafa um nokkurt skeið átt í viðskiptum við fíkniefnasala í Los Angeles sem útvegaði henni ýmis lyfseðilsskyld lyf á svörtum markaði, þar á meðal oxýkódón. Hún er sögð hafa tekið nokkur lyf sem hún hafði keypt af viðkomandi í flugi frá Los Angeles til Suður-Karólínu daginn áður en hún lést.
Bandaríska fíkniefnalögreglan rannsakar nú tengsl Panettiere við meintan fíkniefnasala og reynir að rekja uppruna þeirrar töflu sem grunur leikur á að hafi orðið henni að bana. DEA tekur þátt í rannsókninni bæði í Los Angeles og Suður-Karólínu, auk lögregluyfirvalda í Suður-Karólínu.
Þegar viðbragðsaðilar komu á íbúðina þar sem Panettiere dvaldi ásamt kærasta sínum, Brian Hickerson, afhenti hann þeim poka með lyfjum hennar. Rannsóknin beinist meðal annars að því hvort einhver lyfjanna hafi innihaldið fentanýl.
Hickerson hafði áður reynt að gefa Panettiere Narcan, lyf sem getur snúið við áhrifum ofskömmtunar ópíóíða, eftir að hún fannst meðvitundarlaus. Tilraunin bar ekki árangur.
Málið hefur vakið mikla athygli í Bandaríkjunum, en yfirvöld hafa enn ekki staðfest að fentanýlblönduð oxýkódóntafla hafi verið dánarorsök Panettiere. Rannsókn málsins heldur áfram á meðan beðið er eftir niðurstöðum eiturefnarannsókna.
