Hvað er um að vera? spyr Arndís Björg Sigurgeirsdóttir í opinberri færslu inni í hópnum Kársnesið okkar. En á myndinni má sjá dauða fiska á göngustíg við Kópavogstjörnina að Fífuhvammi.

Þetta er góð spurning og fólk hefur margar kenningar.

Arndís spyr jafnframt: „Getur þetta verið tengt olíunni og hvítu drullunni sem við höfum verið að sjá í Kópavogslæknum?

Ég fann það út um daginn að hvíti liturinn kemur úr röri rétt fyrir neðan skátaheimilið. Ef olían kom þaðan líka þá horfir maður í átt til bensínstöðvarinnar. Kannski eru olíugildrunar farnar að gefa sig?

Þetta verður Kópavogsbær að skoða.“

Annamaría Lind Geirsdóttir telur þetta gæti verið „úr afla einhvers báts og hefur flotið inn Kópavog á flóði en orðið eftir þegar fjaraði út. Kópavogur er grunnur leiruvogur og þal kjörinn til fæðuöflunar vað- og sjófugla. Þessi flatfiskur er hvalreki,“ en Arndísi sýnist þetta vera flundra. „Flundran er grunnsævis- og botnfiskur á leirbotni frá fjöruborði og niður á 100-150 m dýpi. Hún heldur sig oft í vatni við árósa og flækist stundum upp í ár og vötn þannig ef þetta er flundra þá hefur hún ekki komið úr afla neins báts heldur dáið af einhverju orsökum.“

Reynir Gislason minnist þess þegar Kópavogslækurinn var kallaður skítalækurinn. „Skólp fór í lækinn í miklu magni í fjölda ára og síðan kom mikið iðnaðarhverfi í grifjurnar og þá bættist við eitraður úrgangur. Ótrúlegt að ekki séu tekin sýni úr þessum læk mánaðarlega til að fylgjast með úrgangi. Þarna eru börn að leika sér og mjög viðkvæm náttúra. Mikið um kola á þessu svæði.“

Eitt er víst að Kópavogsbær þarf að skoða málið.