Héraðsdómur Reykjaness hefur dæmt spænska ríkisborgarann Gerard Mondet Perez í tveggja ára og tveggja mánaða fangelsi fyrir stórfellt fíkniefnalagabrot eftir að hann flutti tæplega þrjú kíló af kókaíni til landsins í apríl síðastliðnum.

Samkvæmt dómi málsins kom maðurinn til Íslands með flugi frá Barcelona þann 25. apríl 2026. Í farangri hans fundust samtals 2.958,74 grömm af kókaíni með styrkleika á bilinu 37 til 43 prósent. Fíkniefnin voru ætluð til söludreifingar hér á landi í ágóðaskyni.

Ákærði játaði sök við þingfestingu málsins og gekkst greiðlega við því að hafa flutt efnin til landsins. Málið var því tekið til dóms án frekari sönnunarfærslu.

Við ákvörðun refsingar leit dómurinn meðal annars til þess að maðurinn hefur ekki áður gerst sekur um refsiverða háttsemi svo kunnugt sé. Þá lá ekki fyrir að hann hefði átt fíkniefnin eða komið að skipulagningu kaupanna og innflutningsins með öðrum hætti en að samþykkja að flytja efnin til Íslands gegn greiðslu. Jafnframt var tekið tillit til þess að hann játaði brotið skýlaust.

Dómurinn taldi þó ekki unnt að líta fram hjá því að um væri að ræða verulegt magn af sterku kókaíni sem ætlað var til dreifingar á íslenskum fíkniefnamarkaði.

Maðurinn var dæmdur í tveggja ára og tveggja mánaða fangelsi. Honum var gert að greiða rúmlega 2 milljónir króna í sakarkostnað.