Lögregla hafði afskipti af tveimur einstaklingum í annarlegu ástandi í miðborg Reykjavíkur í gærkvöldi og í nótt. Annar þeirra var vistaður í fangaklefa vegna ástands síns en hinum var vísað af mathöll í miðborginni án vandkvæða.

Þá var ökumaður handtekinn grunaður um akstur undir áhrifum áfengis og ávana- og fíkniefna. Viðkomandi er einnig grunaður um að hafa ekið án gildra ökuréttinda og var færður á lögreglustöð þar sem mál hans fór í hefðbundið ferli.

Lögreglu barst einnig tilkynning um umferðarslys í Garðabæ þar sem bifreið var ekið á rafmagnshlaupahjól. Einn einstaklingur var fluttur á slysadeild til aðhlynningar vegna áverka á fæti.

Þá kom upp þjófnaðarmál í verslun í Kópavogi sem afgreitt var á vettvangi. Einnig var tilkynnt um innbrot í stofnun í Breiðholti. Lögregla sinnti vettvangsvinnu vegna málsins og er rannsókn þess í gangi.