Farþegi um borð í flugvél American Airlines var handtekinn eftir að hafa afklæðst og sýnt af sér ósæmilega hegðun fyrir framan aðra farþega á leið til Flórída aðfaranótt laugardags.

Samkvæmt Fox News var konan um borð í flugi frá Baltimore/Washington International Thurgood Marshall-flugvellinum til Miami þegar hún fór úr fötunum og hóf kynferðislega hegðun fyrir augum annarra farþega.

Flugáhöfnin brást þegar við og var flugstjóra gert viðvart um atvikið. Konan var sögð sitja í sætaröð níu. Flugfreyja sendi jafnframt tilkynningu í gegnum samskiptakerfi vélarinnar þar sem óskað var eftir að American Airlines yrði upplýst um málið og lögreglu gert viðvart.

Vélin lenti á alþjóðaflugvellinum í Miami um klukkan 23:30 á föstudagskvöld. Lögregla beið konunnar við komuna og tók hana þegar í stað í sína vörslu.

Ekki liggur fyrir hvort konan hafi verið ákærð vegna atviksins.