Björgvin Víkingsson, framkvæmdastjóri Bónuss, segir að tilkoma sjálfsafgreiðslukassa hafi ekki skapað svigrúm til að lækka vöruverð í verslunum félagsins. Þvert á móti sé álagning á vörum það lág að þriggja prósenta verðlækkun gæti haft alvarleg áhrif á rekstur fyrirtækisins.

Greindi hann frá þessu í Reykjavík síðdegis í gær.

Að sögn Björgvins hefur launakostnaður ekki lækkað þrátt fyrir að fleiri viðskiptavinir afgreiði sig sjálfir. Starfsmenn sem áður störfuðu við hefðbundna afgreiðslukassa sinna nú eftirliti og þjónustu á sjálfsafgreiðslusvæðum auk annarra verkefna í verslununum. Þá fylgi innleiðingu tækninnar einnig kostnaður vegna fjárfestinga, viðhalds og þróunar.

Samkvæmt Björgvini er meginmarkmið sjálfsafgreiðslukassa fyrst og fremst að bæta þjónustu og stytta biðraðir. Kerfin geri verslununum einnig kleift að anna aukinni sölu án þess að fjölga starfsfólki í sama mæli og ella. Fyrirtækið hyggst því halda áfram að fjölga sjálfsafgreiðslukössum þar sem aðstæður leyfa.