Árni Magnússon hefur verið kjörinn formaður stjórnar Háskólans á Bifröst á fundi stjórnar skólans sem haldinn var 19. maí. Þetta kemur fram í tilkynningu frá skólanum þar sem jafnframt er greint frá því að ný stjórn hafi tekið til starfa.

Árni hefur sterk tengsl við skólann en hann lauk MIB-námi í alþjóðaviðskiptum frá Háskólanum á Bifröst auk þess sem hann útskrifaðist frá Samvinnuskólanum á Bifröst árið 1983. Í tilkynningunni segir hann það vera bæði heiður og ánægju að taka við formennskunni.

„Bifröst á sérstakan stað í hjarta mínu, enda á ég þaðan dýrmætar minningar og sterkar taugar til skólans allt frá námsárum mínum þar,“ segir Árni meðal annars. Þá segir hann fram undan spennandi verkefni í ört breytilegu háskólaumhverfi og að hann hlakki til samstarfs við stjórn, starfsfólk og nemendur að áframhaldandi uppbyggingu skólans.

Árni hefur víðtæka reynslu úr stjórnmálum, opinberri stjórnsýslu og atvinnulífi. Hann gegndi embætti félagsmálaráðherra á árunum 2003 til 2006 og starfaði áður sem aðstoðarmaður ráðherra í iðnaðar-, viðskipta- og utanríkisráðuneytinu.

Ólína Kjerúlf Þorvarðardóttir rektor segir nýja stjórn skólans skipaða öflugu fólki með mikla reynslu og þekkingu sem muni nýtast vel í þeim verkefnum sem fram undan séu hjá skólanum. Hún segist vænta mikils af samstarfinu við nýjan stjórnarformann og aðra stjórnarmenn.