Arndís Anna K. Gunnarsdóttir hefur verið ráðin lektor við lagadeild Háskólans á Bifröst en þetta kemur fram í tilkynningu frá skólanum.

Arndís hefur áralanga reynslu af kennslu og rannsóknum á sviði lögfræði, einkum á sviði mannréttinda, fólksflutninga og samskipta borgara og ríkisvalds, bæði á Íslandi og erlendis.

Arndís býr yfir víðtækri starfsreynslu úr stjórnsýslu, lögmennsku og akademíu. Hún hefur meðal annars starfað sem lögfræðingur hjá Rauða krossinum á Íslandi, hjá ráðuneytum og opinberum stofnunum, auk þess sem hún hefur starfað sjálfstætt sem lögmaður. Þá sat hún á Alþingi á árunum 2021–2024.

Arndís lauk meistaraprófi í lögfræði frá Háskóla Íslands og síðar LL.M.-gráðu í mannréttindum og þjóðarétti frá KU Leuven í Belgíu. Á árunum 2017–2020 stundaði hún doktorsnám í mannréttindum við háskólann í Strassborg í Frakklandi.

Við Háskólann á Bifröst mun Arndís sinna kennslu og rannsóknum á sínum sérsviðum og styrkja enn frekar faglegt starf lagadeildarinnar á sviði mannréttinda og opinbers réttar.

Utan starfsins lætur Arndís sig samfélagsmál varða, sinnir fjölbreyttum félagsstörfum og syngur í kór Hallgrímskirkju. Þá hefur hún einnig áhuga á húsasmíði og framkvæmdum, en hún nýtur þess meðal annars að smíða veggi og flota gólf. Ef boðið er upp á karókí eru auk þess allar líkur á að Arndís láti sjá sig þar.