Gerður Pálmadóttir, frumkvöðull og athafnakona, lést 4. mars síðastliðinn. Hún var 77 ára.

Gerður fæddist 24. febrúar 1948 í Reykjavík og ólst þar upp. Foreldrar hennar voru Aðalheiður Árný Árnadóttir og Pálmi Pétursson kennari.

Árið 1966 útskrifaðist Gerður úr Verzlunarskóla Ísland og fór síðan í nám í Myndlista- og handíðaskólanum í Reykjavík. Útskrifaðist hún þaðan úr grafíkdeild árið 1980. Á sama tíma og hún stundaði nám sitt hóf hún að selja notaðar flíkur á útimarkaði á Lækjartorgi. Í framhaldi af því hóf hún rekstur á versluninni Flónni í Hafnarstræti, síðar á Vesturgötunni.

Lengi vel var Gerður kennd við þá verslun en árið 1989 hætti hún rekstrinum og flutti til Hollands.

Gerður stofnaði fyrirtækið Freezing Point í Hollandi, þar sem hún hannaði bæði og framleiddi fatnað með fínum árangri. Á sama tíma stofnaði hún fyrirtækið ARTitIS árið 1995, sem rak verslanir á Shiphol-flugvelli. Þar var lögð áhersla á íslenska hönnun og handverk. Rak hún ARTitIS allt til ársins 2008 er hún seldi reksturinn. Gerður var þó hvergi nærri hætt því hún fékk úthlutað plássi í Westergasfabrik í Amsterdam, sem var gömul gasverksmiðja sem breytt var í Miðstöð lista, skapandi greina og viðskipta. Gerður rak þar hönnunar- og listagallerí þar tilhún flutti aftur til Íslands 2015 og stofnaði Hugvirkjun, með áherslu á eflingu íslensks hugvits.

Samkvæmt mbl.is, sem segir frá andláti Gerðar, lét hún samfélagsmál sig alltaf mikið varða en hún framleiddi á tímabili fatnað í Bangladess en á meðan hún dvaldi þar stofnaði hún lítinn enskuskóla fyrir börn, svo þau gætu búið sig betur undir framtíðina. Helsti ráðgjafi hennar var enginn annar en Muhammad Yunus, einn af stofnendum Grameen-banka sem fékk friðarverðlaun Nóbels árið 2006 fyrir að veita fátæku fólki hagstæð lán.

Gerður var aukreitis einn stofnenda Félags aðstandenda alzheimersjúklinga og var þar í stjórn.

Börn Gerðar með Gunn­ari Páls­syni eru Pálmi Þór, fæddur 1969, og Svan­hvít, fædd 1971. Barna­börn­in eru Sunna Rún, Gunn­ar Tóm­as, Ern­ir Þór og Gerður Lind og barna­barna­börn­in Tóm­as Þór og dreng­ur sem er ný­fædd­ur.

Útför Gerðar fer fram frá Hafn­ar­fjarðar­kirkju föstu­dag­inn 21. mars klukk­an 15.